Qazaqstannyń respýblikalyq mańyzy bar tas joldarynda ainalmaly rolikteri bar jańa tiptegi barerlik qorshaýlar ornatyla bastady. Mundai konstrýktsiialar qazirdiń ózinde Astana ainalma jolynda ornatylǵan, dep habarlaidy Dalanews.kz.
“QazAvtoJol” ulttyq kompaniiasynyń baspasóz qyzmetiniń málimetinshe, qorshaýlardaǵy rolikter soqqy kezinde synbaityn, kerisinshe ainalyp, soqtyǵystyń kúshin jumsartatyn berik materialdan jasalǵan.
“Kólik qorshaýǵa soǵylǵanda, qatty soqqy bolmai, birtindep baǵyt aýystyryp, boilai jyljidy. Bul ásirese qaýipti tustarda — kúrt burylystarda, túsip-shyǵatyn jerlerde jáne kórý múmkindigi shekteýli aimaqtarda asa mańyzdy”, — dedi kompaniia ókilderi.
Mamandardyń aitýynsha, bul jańalyq aýyr apattardyń sanyn azaitýǵa sep bolmaq. Sonymen qatar rolikti qorshaýlar jeńil soqtyǵys kezinde ońai jóndeledi jáne dástúrli metall qorshaýlarǵa qaraǵanda áldeqaida arzan túsedi.
Ulttyq kompaniia jańa júie alǵashqy nátijelerin kórsetip úlgergenin jáne aldaǵy ýaqytta respýblikalyq mańyzy bar joldardyń ózge de qaýipti ýchaskelerinde ornatylýy múmkin ekenin málimdedi.
