Ótken ǵasyrdyń jetpisinshi jyldary salynǵan sý qubyry ábden tozyp, aýyl aýyzsýsyz qalǵan edi. Tóle bı aýdanyna qarasty Zaqambar aýylynda 5 myńǵa jýyq turǵyny bar. Talaı jyldan beri tirshilik nárine táýeldi bolǵan aýyl halqyna aýyzsý kúnine bir saǵat qana berilip kelgen-di. Sol kezde barlyq ydystaryn toltyryp alýǵa asyǵatyn turǵyndar sýdyń qadirin bir kisideı-aq biledi. Barlyǵyn únemdep, ysyrap qylmaýǵa úırengen.
Bıyl mamyr aıynan bastap aýyzsý tartý jumystary bastalǵanda, aýyl turǵyndary bórikterin aspanǵa atyp qýanǵan-dy.
– Kúnine bir-aq saǵat sý beretin. Jaqsy jańalyq estip jatyrmyz. Raqmet. Zaqambar aýylyna aýyzsý tartý jumystaryna búdjetten 402 mln teńge qarjy bólingen. Búginge deıin onyń 212 mıllıony ıgerilipti. Qazir bunda 8 tehnıka men 35 adam tynymsyz jumys isteýde. Olardyń 25-si – aýyl turǵyndary, – deıdi Zaqambar aýylynyń turǵyny Satybaldy Qojaev,
Al qurlys jumystaryna jetekshilik jasap júrgen Qaınarbek Sýbaev: «Smetalyq qujat boıynsha 1006 tutynýshyǵa sý tartý bekitilgen. Aýdan basshylarynyń bizge qosalqy tapsyrmasy boıynsha 30-40 jańadan salynǵan úılerge, jas otbasylarǵa da qosyp berýdi óz moınymyzǵa alyp otyrmyz. Sonymen 1050 abonent bolady. Jaýapty merdiger mekeme sý qubyryn ár úıdiń aýlasyna deıin kirgizip beredi. Ary qaraı úıiniń ishine tartý – árkimniń óz sharýasy. Qazir aýylǵa aýyzsý tartý jumystarynyń 60 paıyzy aıaqtalǵan. Jumys qazan aıyna deıin tolyq bitedi», – dedi.
