Túrkistan oblysynyń ákimi Darhan Satybaldynyń tapsyrmasymen, aýdan, qalalardaǵy eldi mekenderdi abattandyrý, kógaldandyrý, jol boiyndaǵy úilerdiń qasbetterin jáne qorshaýlaryn retke keltirý boiynsha turaqty túrde monitoring júrgizilýde.
Tapsyrmany oryndaý úshin oblys ákimdigi apparatynyń bas inspektorlary zerdeleý jumystaryn júrgizip, kemshilikterdi anyqtaýda.
Onyń qorytyndysy Túrkistan oblysynyń ákimi Darhan Satybaldynyń tóraǵalyǵymen ótken aptalyq apparat otyrysynda baiandaldy. Tazalyq jumystary tiisti deńgeide uiymdastyrylmaǵan ákimder qatań synǵa alyndy.
– Sanitarlyq tazalyq máselesi biraz ýaqyttan beri aitylyp keledi. Tapsyrmalar berildi. Biraq bul saladaǵy jumysta áli de birizdilik joq. Júieli jumys kerek. Tazalyq bar jerde ǵana bereke bolady. Eldi mekenderdi abattandyrý, sanitarlyq tazalyǵyn saqtaý jumystary jalǵasýy tiis, – dedi Darhan Satybaldy.
Oblys ákimi apparatynyń uiymdastyrý-inspektorlyq jumys jáne aýmaqtyq damý bóliminiń basshysy Madiiar Álipovtyń baiandaýynsha, anyqtalǵan kemshilikter eldi mekenderdi jalpy retke keltirý jumystary birqatar aýdan, qalada óz deńgeiinde oryndalmai otyrǵandyǵyn kórsetti.
Atap aitqanda, aýdan, qalalardaǵy kei ǵimarattardyń syrtqy kelbeti eskirgen. Aǵashtar qýrap, retsiz shashylǵan qoqys kóbeigen. Kei demalys oryndary kútimsiz qalǵan.
Oiyn alańshalarynyń qorshaýlary qiraǵan. Qaraýsyz qalǵan ǵimarattardyń qasbetteri retke keltirilmegen. Aryq-atyzdar tazalanbaǵan. Jol belgileri eskirgen, synǵan.
Kemshilikterdi retke keltirýge ýaqyt berildi. Aldaǵy ýaqytta kemshilikterge jol berilgen jaǵdaida aýdan, qala ákimderiniń jaýapkershiligi qaralady.
