Aqmola oblysynyń Tselinograd aýdanyna qarasty Manshúk Mámetova aýyly úshin biylǵy eń basty jańalyq – janynan boi kótergen jańa robottandyrylǵan sút-taýarly fermanyń iske qosylýy. Kóp jyldan beri sheshimin tappai kele jatqan jumyspen qamtý máselesi endi naqty nátije bere bastady. Aýyl mańyna osyndai iri óndiristik nysannyń salynýy tek aýyl turǵyndary úshin emes, búkil óńir úshin erekshe oqiǵa boldy.
70 jańa jumys orny jastarǵa senimdi arttyrdy
«En Dala» JShS-niń bas direktory Timýr Pishenov jýrnalisterge bergen suhbatynda jańa MTF-de 70 turaqty jumys orny ashylǵanyn aitty. Onyń basym bóligi – jergilikti jastar. Bul aýyldyq okrýg úshin teńdessiz kórsetkish. Bir mezette osynsha jumys ornynyń ashylýy buryn-sońdy bolmaǵan.
Búginde jastardyń aýylda qalýy – elimizdiń strategiialyq mindetteriniń biri. Al oǵan sebep bolatyn basty faktor – jalaqy kólemi men áleýmettik qoldaý. Timýr Pshenovtiń aitýynsha, bul fermada ortasha jalaqy shamamen 500 myń teńgeni quraidy, budan bólek, áleýmettik paket qarastyrylǵan. Bul aýyl turmysy úshin orasan qoldaý bolyp sanalady.
Áleýmettik jaýapkershilik: balabaqsha, kómek, turaqtylyq
«En Dala» tek ferma ǵana emes, áleýmettik seriktes retinde de tanylyp otyr. Máselen, kompaniia óz qarjysyna aýylda zamanaýi balabaqsha salyp, ony memleket menshigine ótkizgen. Bul – biznestiń aýyldaǵy ómir sapasyn arttyrýǵa qosqan shynaiy úlesi.
Qazirgi tańda fermada 1 200 bas saýyndy siyr bar. Kúnine 30 tonna sút óndiriledi. Bul kórsetkish boiynsha ferma Aqmola oblysynda ekinshi orynda (birinshi orynda – aty kópshilikke keńinen belgili «Rodina» kompaniiasy).
Jobanyń bolashaq maqsaty – táýliktik sút óndirisin 50 tonnaǵa deiin arttyrý. Barlyq ónim óńirdegi sút zaýyttaryna jiberiledi, odan ári daiyn ónimge ainalyp, tutynýshylarǵa jol tartady.
Qarapaiym sharýadan bastalǵan úlken kásip
– Men keńestik sovhozdardy basqaryp, keiin naryqqa ikemdep alyp shyqqan «qyzyl direktorlardyń» qatarynan emespin, – deidi Timýr Pishenov. – Bárin taza betten, qarapaiym eńbekpen bastadym. Ýaqytynda bar-joǵy 46 gektar jerim boldy. Jyl ótken saiyn tynymsyz eńbekpen qazirgi kásiporyndy qurdym. 34 jyldan beri aýyl sharýashylyǵynda eńbek etýdemin. Salanyń ózgeristerin, qiyndyqtaryn da, múmkindikterin de tereń túsinemin.
Memlekettik qoldaý men onyń nátijesi isti órge domalatty
Pishenovtiń aitýynsha, memleket tarapynan fermerlerge qoldaý burynnan kórsetilgen, alaida sońǵy 2-3 jylda bul sharalar shyn máninde tiimdi bola bastady. Jeńildetilgen nesieler, investitsiialyq sýbsidiialar, tehnika men infraqurylymdy qoldaý siiaqty naqty qadamdar aýyl kásipkerlerine jańa tynys berýde.
Ol memleket tarapynan AÓK-ti keshendi damytýǵa baǵyttalǵan saiasat jalǵasyn tabatynyna senedi. Sebebi, aýyl sharýashylyǵy – el ekonomikasynyń turaqtylyǵy men azyq-túlik qaýipsizdiginiń negizi.
Manshúk Mámetova aýylyndaǵy «En Dala» JShS-niń jańa jobasy – búgingi Qazaqstandaǵy aýyldyń jańarý, damý úlgisi. Bul ferma – tek sút óndirisi emes, jastarǵa jumys, aýylǵa ómir, elge úmit. Al «molochnye reki» – ózdiginen aǵylmaidy, ony aǵyndatatyn – tabandylyq, eńbek, senim jáne memlekettik qoldaý.
