اقمولا وبلىسىنىڭ سەلينوگراد اۋدانىنا قاراستى مانشۇك مامەتوۆا اۋىلى ءۇشىن بيىلعى ەڭ باستى جاڭالىق – جانىنان بوي كوتەرگەن جاڭا روبوتتاندىرىلعان ءسۇت-تاۋارلى فەرمانىڭ ىسكە قوسىلۋى. كوپ جىلدان بەرى شەشىمىن تاپپاي كەلە جاتقان جۇمىسپەن قامتۋ ماسەلەسى ەندى ناقتى ناتيجە بەرە باستادى. اۋىل ماڭىنا وسىنداي ءىرى وندىرىستىك نىساننىڭ سالىنۋى تەك اۋىل تۇرعىندارى ءۇشىن ەمەس، بۇكىل ءوڭىر ءۇشىن ەرەكشە وقيعا بولدى.
70 جاڭا جۇمىس ورنى جاستارعا سەنىمدى ارتتىردى
«ەن دالا» ءجشس-نىڭ باس ديرەكتورى تيمۋر پىشەنوۆ جۋرناليستەرگە بەرگەن سۇحباتىندا جاڭا متف-دە 70 تۇراقتى جۇمىس ورنى اشىلعانىن ايتتى. ونىڭ باسىم بولىگى – جەرگىلىكتى جاستار. بۇل اۋىلدىق وكرۋگ ءۇشىن تەڭدەسسىز كورسەتكىش. ءبىر مەزەتتە وسىنشا جۇمىس ورنىنىڭ اشىلۋى بۇرىن-سوڭدى بولماعان.
بۇگىندە جاستاردىڭ اۋىلدا قالۋى – ەلىمىزدىڭ ستراتەگيالىق مىندەتتەرىنىڭ ءبىرى. ال وعان سەبەپ بولاتىن باستى فاكتور – جالاقى كولەمى مەن الەۋمەتتىك قولداۋ. تيمۋر پشەنوۆتىڭ ايتۋىنشا، بۇل فەرمادا ورتاشا جالاقى شامامەن 500 مىڭ تەڭگەنى قۇرايدى، بۇدان بولەك، الەۋمەتتىك پاكەت قاراستىرىلعان. بۇل اۋىل تۇرمىسى ءۇشىن وراسان قولداۋ بولىپ سانالادى.
الەۋمەتتىك جاۋاپكەرشىلىك: بالاباقشا، كومەك، تۇراقتىلىق
«ەن دالا» تەك فەرما عانا ەمەس، الەۋمەتتىك سەرىكتەس رەتىندە دە تانىلىپ وتىر. ماسەلەن، كومپانيا ءوز قارجىسىنا اۋىلدا زاماناۋي بالاباقشا سالىپ، ونى مەملەكەت مەنشىگىنە وتكىزگەن. بۇل – بيزنەستىڭ اۋىلداعى ءومىر ساپاسىن ارتتىرۋعا قوسقان شىنايى ۇلەسى.
قازىرگى تاڭدا فەرمادا 1 200 باس ساۋىندى سيىر بار. كۇنىنە 30 توننا ءسۇت وندىرىلەدى. بۇل كورسەتكىش بويىنشا فەرما اقمولا وبلىسىندا ەكىنشى ورىندا (ءبىرىنشى ورىندا – اتى كوپشىلىككە كەڭىنەن بەلگىلى «رودينا» كومپانياسى).
جوبانىڭ بولاشاق ماقساتى – تاۋلىكتىك ءسۇت ءوندىرىسىن 50 تونناعا دەيىن ارتتىرۋ. بارلىق ءونىم وڭىردەگى ءسۇت زاۋىتتارىنا جىبەرىلەدى، ودان ءارى دايىن ونىمگە اينالىپ، تۇتىنۋشىلارعا جول تارتادى.
قاراپايىم شارۋادان باستالعان ۇلكەن كاسىپ
– مەن كەڭەستىك سوۆحوزداردى باسقارىپ، كەيىن نارىققا يكەمدەپ الىپ شىققان «قىزىل ديرەكتورلاردىڭ» قاتارىنان ەمەسپىن، – دەيدى تيمۋر پىشەنوۆ. – ءبارىن تازا بەتتەن، قاراپايىم ەڭبەكپەن باستادىم. ۋاقىتىندا بار-جوعى 46 گەكتار جەرىم بولدى. جىل وتكەن سايىن تىنىمسىز ەڭبەكپەن قازىرگى كاسىپورىندى قۇردىم. 34 جىلدان بەرى اۋىل شارۋاشىلىعىندا ەڭبەك ەتۋدەمىن. سالانىڭ وزگەرىستەرىن، قيىندىقتارىن دا، مۇمكىندىكتەرىن دە تەرەڭ تۇسىنەمىن.
مەملەكەتتىك قولداۋ مەن ونىڭ ناتيجەسى ءىستى ورگە دومالاتتى
پىشەنوۆتىڭ ايتۋىنشا، مەملەكەت تاراپىنان فەرمەرلەرگە قولداۋ بۇرىننان كورسەتىلگەن، الايدا سوڭعى 2-3 جىلدا بۇل شارالار شىن مانىندە ءتيىمدى بولا باستادى. جەڭىلدەتىلگەن نەسيەلەر، ينۆەستيسيالىق سۋبسيديالار، تەحنيكا مەن ينفراقۇرىلىمدى قولداۋ سياقتى ناقتى قادامدار اۋىل كاسىپكەرلەرىنە جاڭا تىنىس بەرۋدە.
ول مەملەكەت تاراپىنان اوك-تى كەشەندى دامىتۋعا باعىتتالعان ساياسات جالعاسىن تاباتىنىنا سەنەدى. سەبەبى، اۋىل شارۋاشىلىعى – ەل ەكونوميكاسىنىڭ تۇراقتىلىعى مەن ازىق-تۇلىك قاۋىپسىزدىگىنىڭ نەگىزى.
مانشۇك مامەتوۆا اۋىلىنداعى «ەن دالا» ءجشس-نىڭ جاڭا جوباسى – بۇگىنگى قازاقستانداعى اۋىلدىڭ جاڭارۋ، دامۋ ۇلگىسى. بۇل فەرما – تەك ءسۇت ءوندىرىسى ەمەس، جاستارعا جۇمىس، اۋىلعا ءومىر، ەلگە ءۇمىت. ال «مولوچنىە رەكي» – وزدىگىنەن اعىلمايدى، ونى اعىنداتاتىن – تاباندىلىق، ەڭبەك، سەنىم جانە مەملەكەتتىك قولداۋ.
