Májilis depýtaty Rinat Zaiytov aýyldardyń qazirgi jai-kúiine nazar aýdaryp, Premer-ministrge saýal joldady, dep habarlaidy Dalanews.kz.
Onyń aitýynsha, aýyldar qaraýsyz qalǵan qarttyń kúiin keship otyr.
“34 jyl ishinde qanshama aýyl turǵyny týǵan jerin amalsyz tastap ketti. Buǵan infraqurylymnyń joqtyǵy, meditsinalyq qyzmet pen bilim sapasynyń tómendigi, turaqty jumystyń jetispeýshiligi, tipti qarapaiym internettiń bolmaýy sebep. Sonyń saldarynan, qanshama aýylymyz “mújilgen súiektei” múshkil halge jetip, jabylyp qaldy”, – dedi depýtat.
Onyń sózinshe, 2024 jyldyń ózinde Soltústik Qazaqstan oblysynda 141 aýyldyń resmi mártebesi joiylǵan.
“Sońǵy 5 jylda ShQO-da 350 aýyl, SQO-da 635, Pavlodar oblysy boiynsha 352 aýyl bos qaldy. Bul jai ǵana sandar emes, bul – myńdaǵan otbasynyń týǵan jeri, ómiriniń bir bólshegi. Aýyl degen jai jaba salatyn esik emes, qazaqtyń altyn besigi ekenin nege umyttyq? Iá, Úkimettiń “Aýyl – el besigi” jáne AMANAT partiiasynyń “Aýyl amanaty” degen aýyl tamyryna qan júrgizetin, sátti baǵdarlamalary usynylyp jatyr, olardy tipti engizdi de. Nátijesi de jaman emes. Biraq bir - eki baǵdarlama Qazaqstannyń barlyq aýyldaryn gúldendirip jibere almaidy ǵoi”, – dep atap ótti Zaiytov.
Aýyl sharýashylyǵyna kedergiler kóp
Depýtattyń aitýynsha, Memleket basshysy aýyldy damytý máselesin birneshe ret kótergenimen, is júzinde jaǵdai ózgermegen.
“Búginde aýyl turǵyndary óz kúshimen kásip ashaiyn dese – qarjy tapshy, jer alǵysy kelse – múmkindik joq, mal ósireiin dese – infraqurylym qarastyrylmaǵan. Tipti aýyl ákimderiniń ózinde qajetti tehnika men qarjy jetkiliksiz. Osyndai jaǵdaida halyqqa “aýyldan nege kóshesińder?” dep suraýdyń ózi artyq”, – dedi ol.
Zaiytovtyń aitýynsha, Abai oblysy Aiagóz aýdanynda aldaǵy ýaqytta 10-nan astam aýyl jabylýy múmkin, alaida bul máseleni sheshýge eshbir sheneýnik kirispegen.
“Qazaq óz tamyryn ózi kesse, qalai gúldeidi? Álde bilik barsha halyqty qalaǵa shoǵyrlandyrýdy kózdeitin jasyryn saiasat júrgizip otyr ma?” – dep saýal tastady depýtat.
Aýyldardy saqtaý úshin Rinat Zaiytov Úkimetke kelesi sharalardy qolǵa alýdy usyndy:
1. Aýyl ákimderiniń quzyretin keńeitý;
2. Ár aýyldy kem degende bir tehnikamen qamtamasyz etý;
3. Bul máseleni ulttyq deńgeige kóterip, Premer-ministr men oblys ákimderiniń qatysýymen qonys aýdarý jónindegi memlekettik komissiia qurý;
4. Aýyl jastaryn turaqtandyrýǵa baǵyttalǵan naqty jospar ázirlep, ony jastarǵa jetkizý.
