Búgin «Aýyl» partiiasy Saiasi keńesiniń atom elektr stantsiiasy qurylysy boiynsha jalpyhalyqtyq referendým ótkizýge bailanysty Qazaqstan halqyna jáne partiia múshelerine úndeýi arnady. Óz kezeginde «Aýyl» partiiasy elimizde AES salýdy qoldaityndaryn ashyq aitty, – dep habarlaidy Dalanews.kz.
Qadirli qazaqstandyqtar!
Qurmetti partiialastar!
Álemdik ekonomikanyń qazirgi jaǵdaiy, halyqaralyq naryqtardaǵy qatań básekelestiktiń artýy, geosaiasi teketirestiń kúsheiýi árbir memleketke energetikalyq qaýipsizdik máselelerine basa kóńil bólýdi talap etedi. Básekege qabiletti, ári sapaly ónerkásip pen aýyl sharýashylyǵy ónimderin óndirý otandyq energetikany qarqyndy damytý qajettiligin týyndatyp otyr.
Elimizde dástúrli jáne dástúrli emes kózderden energiia óndirýdiń ózindik problemalary bar ekeni belgili. Mysaly, sońǵy kezderi sý tapshylyǵynyń artýy bizdi sý elektr energiiasyn óndirýdiń bolashaǵyna kúmánmen qaraýǵa májbúrleidi. Munai men gaz qorlary da sheksiz emes. Sondyqtan munai, gaz qorlaryna negizdelgen uzaq merzimdi paidalanylatyn energetikalyq jobalardy josparlaý múmkin emes.
Kómir otynyn paidalaný qazirdiń ózinde kúrdeli ekologiialyq máselelerdi týyndatýda. Atalmysh ekologiialyq máselelerdiń eń bastysy – qurǵaqshylyqqa, shóleittenýge jáne aýyl sharýashylyǵy ónimderiniń úlesin aitarlyqtai joǵaltýǵa alyp keletin jahandyq klimattyń ózgerýi.
Qazaqstanda kún jáne jel energiiasy sekildi dástúrli emes qýat kózderiniń aitarlyqtai áleýeti bar. Alaida munyń da energiia qorlaryn jinaqtaý jáne turaqtandyrý siiaqty tehnologiialyq máselelerdiń sheshilmeýi saldarynan kómir men kómirsýtekterdi tolyqtai almastyra almaityny belgili bolyp otyr. Elimiz qazirdiń ózinde elektr qýatynyń tapshylyǵyn sezinýde jáne ony aitarlyqtai kólemde importtaýǵa májbúr.
Elektr qýatynyń tapshylyǵy oryn alǵanda ony eń aldymen aýyldar men aýyl sharýashylyǵy salasy ótkir sezinetinin kezinde jaryqsyz qalǵan aýyldardyń mysalynan jaqsy bilemiz. Qazirgi tańda atom elektrostantsiialary álemdegi kóptegen elder úshin eń turaqty energiia kózderiniń bir bolyp otyr.
Memleket basshysy Q.K.Toqaev 2023 jylǵy 1 qyrkúiektegi Qazaqstan halqyna Joldaýynda atom elektr stantsiiasyn salý nemese salýdan bas tartý elimizdiń bolashaǵyna qatysty asa mańyzdy másele ekenin atap ótip, ony jalpyulttyq referendýmda sheshýdi usyndy. Óz kezeginde «Aýyl» Partiiasy Qazaqstannyń ekologiialyq jáne energetikalyq qaýipsizdigi, sondai-aq keler urpaqtyń bolashaǵy úshin qabyldanatyn sheshimniń mańyzdylyǵyn eskere otyryp, árbir qazaqstandyqty referendýmda óz kózqarasyn bildirip, atom elektr stantsiiasyn salýdy qoldaýǵa shaqyrady.
Úndeý «Aýyl» Partiiasy Saiasi keńesiniń 2024 jylǵy 27 tamyzdaǵy otyrysynda qabyldandy. Astana qalasy
