بۇگىن «اۋىل» پارتياسى ساياسي كەڭەسىنىڭ اتوم ەلەكتر ستانسياسى قۇرىلىسى بويىنشا جالپىحالىقتىق رەفەرەندۋم وتكىزۋگە بايلانىستى قازاقستان حالقىنا جانە پارتيا مۇشەلەرىنە ۇندەۋى ارنادى. ءوز كەزەگىندە «اۋىل» پارتياسى ەلىمىزدە اەس سالۋدى قولدايتىندارىن اشىق ايتتى، – دەپ حابارلايدى Dalanews.kz.
ءقادىرلى قازاقستاندىقتار!
قۇرمەتتى پارتيالاستار!
الەمدىك ەكونوميكانىڭ قازىرگى جاعدايى، حالىقارالىق نارىقتارداعى قاتاڭ باسەكەلەستىكتىڭ ارتۋى، گەوساياسي تەكەتىرەستىڭ كۇشەيۋى ءاربىر مەملەكەتكە ەنەرگەتيكالىق قاۋىپسىزدىك ماسەلەلەرىنە باسا كوڭىل ءبولۋدى تالاپ ەتەدى. باسەكەگە قابىلەتتى، ءارى ساپالى ونەركاسىپ پەن اۋىل شارۋاشىلىعى ونىمدەرىن ءوندىرۋ وتاندىق ەنەرگەتيكانى قارقىندى دامىتۋ قاجەتتىلىگىن تۋىنداتىپ وتىر.
ەلىمىزدە ءداستۇرلى جانە ءداستۇرلى ەمەس كوزدەردەن ەنەرگيا ءوندىرۋدىڭ وزىندىك پروبلەمالارى بار ەكەنى بەلگىلى. مىسالى، سوڭعى كەزدەرى سۋ تاپشىلىعىنىڭ ارتۋى ءبىزدى سۋ ەلەكتر ەنەرگياسىن ءوندىرۋدىڭ بولاشاعىنا كۇمانمەن قاراۋعا ماجبۇرلەيدى. مۇناي مەن گاز قورلارى دا شەكسىز ەمەس. سوندىقتان مۇناي، گاز قورلارىنا نەگىزدەلگەن ۇزاق مەرزىمدى پايدالانىلاتىن ەنەرگەتيكالىق جوبالاردى جوسپارلاۋ مۇمكىن ەمەس.
كومىر وتىنىن پايدالانۋ ءقازىردىڭ وزىندە كۇردەلى ەكولوگيالىق ماسەلەلەردى تۋىنداتۋدا. اتالمىش ەكولوگيالىق ماسەلەلەردىڭ ەڭ باستىسى – قۇرعاقشىلىققا، شولەيتتەنۋگە جانە اۋىل شارۋاشىلىعى ونىمدەرىنىڭ ۇلەسىن ايتارلىقتاي جوعالتۋعا الىپ كەلەتىن جاھاندىق كليماتتىڭ وزگەرۋى.
قازاقستاندا كۇن جانە جەل ەنەرگياسى سەكىلدى ءداستۇرلى ەمەس قۋات كوزدەرىنىڭ ايتارلىقتاي الەۋەتى بار. الايدا مۇنىڭ دا ەنەرگيا قورلارىن جيناقتاۋ جانە تۇراقتاندىرۋ سياقتى تەحنولوگيالىق ماسەلەلەردىڭ شەشىلمەۋى سالدارىنان كومىر مەن كومىرسۋتەكتەردى تولىقتاي الماستىرا المايتىنى بەلگىلى بولىپ وتىر. ەلىمىز ءقازىردىڭ وزىندە ەلەكتر قۋاتىنىڭ تاپشىلىعىن سەزىنۋدە جانە ونى ايتارلىقتاي كولەمدە يمپورتتاۋعا ءماجبۇر.
ەلەكتر قۋاتىنىڭ تاپشىلىعى ورىن العاندا ونى ەڭ الدىمەن اۋىلدار مەن اۋىل شارۋاشىلىعى سالاسى وتكىر سەزىنەتىنىن كەزىندە جارىقسىز قالعان اۋىلداردىڭ مىسالىنان جاقسى بىلەمىز. قازىرگى تاڭدا اتوم ەلەكتروستانسيالارى الەمدەگى كوپتەگەن ەلدەر ءۇشىن ەڭ تۇراقتى ەنەرگيا كوزدەرىنىڭ ءبىر بولىپ وتىر.
مەملەكەت باسشىسى ق.ك.توقايەۆ 2023 جىلعى 1 قىركۇيەكتەگى قازاقستان حالقىنا جولداۋىندا اتوم ەلەكتر ستانسياسىن سالۋ نەمەسە سالۋدان باس تارتۋ ەلىمىزدىڭ بولاشاعىنا قاتىستى اسا ماڭىزدى ماسەلە ەكەنىن اتاپ ءوتىپ، ونى جالپىۇلتتىق رەفەرەندۋمدا شەشۋدى ۇسىندى. ءوز كەزەگىندە «اۋىل» پارتياسى قازاقستاننىڭ ەكولوگيالىق جانە ەنەرگەتيكالىق قاۋىپسىزدىگى، سونداي-اق كەلەر ۇرپاقتىڭ بولاشاعى ءۇشىن قابىلداناتىن شەشىمنىڭ ماڭىزدىلىعىن ەسكەرە وتىرىپ، ءاربىر قازاقستاندىقتى رەفەرەندۋمدا ءوز كوزقاراسىن ءبىلدىرىپ، اتوم ەلەكتر ستانسياسىن سالۋدى قولداۋعا شاقىرادى.
ۇندەۋ «اۋىل» پارتياسى ساياسي كەڭەسىنىڭ 2024 جىلعى 27 تامىزداعى وتىرىسىندا قابىلداندى. استانا قالاسى
