Saryaǵash aýdanynyń ákimi Muhıt Otarshıev Jarty tóbe aýyldyq okrýgine qarasty Bostandyq eldi mekenindegi jańadan qurylysy júrgizilip jatqan aýyz sý munarasynyń jáne sý qubyrlarynyń qurylysymen tanysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Eldi mekender úshin sý máselesi óte mańyzdy. Aýdanda eldi mekenderdiń 60,2 paıyzy ǵana ortalyqtandyrylǵan sý júıesine qosylǵan. Sol sebepti turǵyndardy taza tirshilik nárimen qamtamasyz etý jumystary kezeń-kezeńimen atqarylyp keledi.

Qurylys nysanynda bolǵan aýdan basshysy búgingi kúnge deıin atqarylǵan jumys jaǵdaıyn saralaı otyryp, aldaǵy ýaqytta atqarylatyn jumystar boıynsha jaýapty merdiger mekeme mamandaryna qurylystyń sapaly júrgizilýin jáne belgilengen merzimde aıaqtalýyn tapsyrdy.

Aıta ketsek, qazirgi tańda eldi mekenge merdiger mekeme «A.S. InveStroı» JSHS-gi tarapynan 37 shaqyrym sý qubyrlary júrgizilip, aýyz sý qudyqtary men sý saqtaý qoımalary ornatylǵan.

Jalpy qurylys jumystary aıaqtalǵannan keıin eldi mekendegi 513 abonent, ıaǵnı 3956 turǵyn sapaly aýyz sýmen qamtylatyn bolady. Qurylys jumystaryn bıyl jeltoqsan aıynda tolyǵymen aıaqtap, paıdalanýǵa berý josparlanǵan.