Prezident Qasym-Jomart Toqaev «Ádiletti Qazaqstan: bárimiz jáne árqaisymyz úshin. Qazir jáne árdaiym» dep atalatyn sailaýaldy baǵdarlamasynda aýyl turǵyndarynyń ómir sapasyn jaqsartýǵa basymdyq bergen edi. Aldaǵy jeti jylda aýyl turǵyndarynyń tabysyn arttyrý úshin 1 trln. teńge bólý kózdelgen. Bul qarajat aýyl sharýashylyǵy salasynda 350 myńnan astam sapaly jumys ornyn ashýǵa múmkindik beredi. QR Parlamentiniń VIII shaqyrylymdaǵy alǵashqy sessiiasynyń ashylýynda Memleket basshysy aýyl turǵyndaryna 5-7 jylǵa jyldyq ósimi 2,5 paiyz bolatyn shaǵyn nesie beriletinin málimdedi. «AMANAT» partiiasy atalǵan jobany Úkimetpen birlesip júzege asyrýda.
«AMANAT»-tyń Hatshysy Eldar Jumaǵazievtiń aitýynsha, joba aiasynda sharýalar óńirlik áleýmettik-kásipkerlik korporatsiiasy arqyly nesie rásimdei alady; lizingke aýyl sharýashylyǵy tehnikasyn ala alady, al tehnika qunynyń 50%-yn memleket sýbsidiialaidy; servistik-ótkizý kooperativterin qura alady jáne taǵy basqa.
– «AMANAT» partiiasy aýyldyń ál-aýqatyn jaqsartý, aýyl sharýashylyǵyn qoldaý – memlekettiń strategiialyq mindetteriniń biri ekenine senimdi. Jeke qosalqy jáne sharýa qojalyqtary, fermalar, aýyl sharýashylyǵy ónimderin qaita óńdeý kásiporyndary árdaiym túsinikti jáne turaqty erejeler boiynsha qoldaýǵa ie bolýy tiis.
Sondyqtan biz Úkimet múshelerimen birlesip «Aýyl amanaty» jobasy aiasynda Prezident tapsyrmalaryn oryndaý maqsatynda jergilikti jerlerde qabyldanatyn sharalarmen tanysyp jatyrmyz. Bul joba aýyl turǵyndaryna óz isin ashýǵa múmkindik bere otyryp, halyqtyń tabysyn arttyrýǵa yqpal etedi. Partiia tarapynan aqparattyq-túsindirý jumysyn júrgizip, jobaǵa qatysýshylardy oqytamyz, – dedi Eldar Jumaǵaziev.
Al Premer-Ministrdiń orynbasary Altai Kólginov Mahambet aýdanynyń turǵyndarymen kezdesý kezinde «Aýyl amanaty» jobasy aýyldaǵy jumyspen qamtý máselesin sheshýge septigin tigizetinin jetkizdi.
– Kóktem – bastamany óz qolyńyzǵa alý, óz biznesińizdi bastaý ýaqyty. Onyń ústine memleket jeke qosalqy sharýashylyqty nemese kásipkerlikti damytý úshin jeńildetilgen paiyzdyq mólsherlememen qolaily jaǵdailar, nesielik demalystar jáne basqa da múmkindikter beredi. Oblys ákimdiginiń tapsyrysyna sáikes «Aýyl amanaty» baǵdarlamasyn júzege asyrý úshin Atyraý oblysyna 1 mlrd 504 mln teńge bólindi. Bul qarajatqa 188 nesie berip, 200-ge jýyq jeke qosalqy sharýashylyq qurý josparlanýda, – dedi Premer-Ministrdiń orynbasary.
Óz kezeginde, kezdesýge qatysqan sharýa qojalyǵynyń basshysy Asqar Tasqaliev daiyn ónimdi halyqqa qoljetimdi baǵamen jetkizý úshin memleket qoldaýy qajet ekenin atap ótti.
Aita keteiik, byltyr 40 kúndik aýqymdy aqparattyq marafon uiymdastyryldy. «AMANAT»-tyń trenerleri mobildi toptar quramynda 28 shilde men 10 qyrkúiek aralyǵynda elimizdegi 179 aýdannyń 425 aýyly men aýyldyq okrýginde 250 myń azamatty qamti otyryp, kezdesý ótkizdi. Al partiianyń Saiasi menedjment akademiiasy aýyl, aýyldyq okrýg ákimderi jáne «AMANAT»-tyń aýmaqtyq filialdarynyń atqarýshy hatshylary úshin halyqtyń ekonomikalyq belsendiligin arttyrý salasyndaǵy quzyretterdi damytý boiynsha erekshe kýrstar ótkizdi. Oǵan 2346 adam qatysty.
