Oblys ákimi A. Batalov aldymen jinalǵandardy qatar kelgen qos mereke – Otan qorǵaýshylar kúnimen jáne Jeńis kúnimen quttyqtap, atalmysh meiramdardyń alatyn orny men mańyzyn atap ótti. Prezident Jarlyǵymen birqatar jetisýlyq Otan qorǵaýshylar kúninde memlekettik nagradalar men áskeri ataqtarǵa ie bolǵanyn, sonyń ishinde aýǵandyq ardager, «Almaty oblystyq Aýǵan soǵysy ardagerler uiymy» qoǵamdyq birlestigi tóraǵasynyń orynbasary Qazbek Beiisbekovke II dárejeli «Aibyn» ordeni berilgenin tilge tiek ete kele, marapat iesiniń keýdesine nagrada taqty. Aita ketsek, Qazbek Beiisbekovke atalmysh nagradaáskeri jáne qyzmet babyndaǵy paryzyn óteýdegi kórsetken batyldyǵy men janqiiarlyǵy, sondai-aq memleket múddesin qorǵaýda jasaǵan erligi úshin usynyldy.
– Otan qorǵaýshylar kúnine orai berilgen úlken marapatyń qutty bolsyn. Aýǵan soǵysyndaǵy erlik isterińe, búgingi beibit ómirdegi atqarǵan eńbekterińe kórsetilgen laiyqty qurmet dep bilemin. Budan bylai da oblystyń qoǵamdyq-saiasi ómirine, jetistikteri men jeńisterine, tynyshtyǵy men bereke-birligine atsalysady dep senemin, – dedi A. Batalov. Oblys ákimi sonymen qatar aýǵan soǵysy ardagerlerine jasalyp otyrǵan qamqorlyq sharalaryn aita kele, qalada salynǵan kottejdji qalashyqtan kóp balaly jáne az qamtylǵan otbasylarymen birge birqatar aýǵandyq ardagerlerge de turǵyn úi beriletinin atap ótti.
Óz kezeginde Qazbek Beiisbekov tósine taǵylǵan bul nagrada tek ózine ǵana emes, búkil Almaty oblysynyń qorjynyna túsken marapat, búkil qarýlastaryna kórsetilgen qurmet, barsha aýǵandyq ardagerlerdiń qýanyshy ekenin aityp, el azamattaryna rizashylyǵyn bildirdi.
Marapattaý rásimine kelgen «Almaty oblysy jergilikti soǵys jáne Aýǵan ardagerler odaǵy» qoǵamdyq birlestiginiń tóraǵasy Baýyrjan Barlybaev, «Almaty oblystyq Aýǵan soǵysy ardagerler uiymy» qoǵamdyq birlestiginiń tóraǵasy Kairat Janabaev, aýǵan soǵysyń ardageri Murat Meiirbekov, sharaǵa qatysqan oblystyq ardagerler uiymynyń tóraǵasy Ermek Kelemseiit, oblystyq máslihat hatshysy Sultan Dúisembinov te ózderiniń tilekterin jetkizip, yqylastaryn bildirdi.
Atap ótsek, búgingi kúni Almaty oblysynda 1876 aýǵandyq ardager bar. Olardyń basyn qosyp otyrǵan 5 oblystyq qoǵamdyq uiym jumys isteidi. Aýǵan soǵysy ardagerleri jastardy eljandylyq rýhta tárbieleý isine, túrli qoǵamdyq, sporttyq sharalar uiymdastyrýǵa belsene atsalysyp júr. Máselen, aldaǵy ýaqytta Aýǵanstannan áskerdiń shyǵarylǵanyna 30 jyl tolýyna orai voleiboldan týrnirler, avtosaiys uiymdastyrý josparlanǵan.
Almaty oblysy ákiminiń baspasóz qyzmeti
