Búgin Úkimet otyrysynda Qazaqstandaǵy aviatsiialyq qaýipsizdikke tóngen negizgi qaýipterdiń biri retinde áýejailar mańyndaǵy qoqys oryndary men retsiz qurylys máselesi kóterildi, dep habarlaidy dalanews.kz.
Qazaqstannyń Aviatsiialyq ákimshiligi usynǵan baiandamada Atyraý, Semei, Óskemen, Kókshetaý, Balqash jáne Úrjar áýejailary mańyndaǵy qoqys poligondary ushý qaýipsizdigine qaýip tóndirip otyrǵany aityldy.
«Atyraý, Semei, Óskemen, Kókshetaý, Balqash jáne Úrjar áýejailarynyń mańynda ornalasqan qoqys poligondary áýe kemeleriniń qustarmen soqtyǵysý qaýpin arttyryp, áýe kompaniialary úshin paidalaný shekteýlerin týǵyzýda. 2025 jyly áýe kemeleriniń qustarmen soqtyǵysýynyń 280 jaǵdaiy tirkelse, biylǵy jyldyń birinshi toqsanynda mundai oqiǵa sany 33 bolǵan», – delingen baiandamada.
Úkimetke Atyraý áýejaiynyń mańyndaǵy qoqys orny kórsetilgen. Mamandardyń aitýynsha, bul aýmaq qustardy tartyp, ushý qaýipsizdigine tikelei qater tóndirip otyr.
Sonymen qatar aviatsiia salasynda taǵy bir másele kóterildi. Áýejailar mańyndaǵy aýmaqtarda zańsyz nysandar kóbeiip, jerlerdiń maqsatsyz paidalanylýy jalǵasyp jatyr.
«Taǵy bir másele – áýejailar mańyndaǵy aýmaqtarda kedergiler sanynyń kóbeiýi jáne jerlerdi maqsatsyz paidalaný. Almaty áýejaiynyń mańyndaǵy aýmaqta shamamen 160 kedergi anyqtalsa, Shymkent áýejaiy aýmaǵynda olardyń sany 150-den asady», – dep kórsetilgen qujatta.
Aviatsiialyq ákimshilik áýejai mańyndaǵy aýmaqtardy aimaqtarǵa bólý shemalaryn ázirlep, ákimdikterge jibergen. Alaida kóp jaǵdaida bul qujattar bas josparlarǵa engizilmegen.
«Alaida kóp jaǵdaida bul aimaqtarǵa bólý shemalary áli kúnge deiin eldi mekenderdi damytý jónindegi bas josparlarǵa engizilmegen. Sonyń saldarynan áýejailar mańynda jańa nysandar men qosymsha kedergilerdiń paida bolýy jalǵasyp jatyr», – delingen baiandamada.
Sondai aq 2025 jyl jáne 2026 jyldyń birinshi toqsany aralyǵynda azamattyq aviatsiia sýbektilerine 1202 tekserý júrgizilgen. Nátijesinde jeti áýe kompaniiasyna qatysty sertifikattardy toqtatý nemese qaitaryp alý sharalary qabyldanǵan. Budan bólek tórt aviatsiialyq oqý ortalyǵynyń qyzmeti toqtatylyp, áýe kemelerine tehnikalyq qyzmet kórsetetin eki uiymnyń sertifikatynyń kúshi ýaqytsha toqtatylǵan. Sonymen qatar segiz áýeailaqqa qatysty 15 shekteý engizilgen.
