Eń aldymen tilshiler qaýymy jaqynda ǵana paidalanýǵa berilgen Dańq alleiasyna aialdady. Aýdan ákiminiń orynbasary Beisenbai Tórebekov 1941-1945 jyldar aralyǵynda Maqtaral aýdanynan 32 myńnan asa adam Uly Otan soǵysyna attanyp, sonyń 3900-i ǵana aman-esen elge oralǵanyn atap ótti. Onyń ishinde 12 adam "Keńes Odaǵynyń batyry" ataǵyn alǵan eken.
– Árine, el úshin qan tókken bozdaqtar el esinde máńgi saqtalýy tiis. Mine, osyny eskergen aýdanymyzdyń ákimi Baqyt Asanovtyń bastamasymen S.Qojanov kóshesi boiyndaǵy máńgilik alaý eskertkishin qaita qurý úshin biýdjetten 137 million teńge qarjy qaralyp, merdiger "Taimas company" JShS tarapynan qurylys jumystary júrgizildi – dedi Beisenbai Tasbolatuly.
– Myrzakentke alǵash kelgenimizde ortalyq kóshelerdiń boiynda mal jaiylyp júretin edi. Qýraǵan aǵashtar, óspegen gúlder, eskirgen ǵimarattar. Árine, munyń bári álige deiin kóz aldymda. Biz eń alǵash jumysymyzdy senbilik jasaýdan bastap, jańadan aýdan ortalyǵy bolǵan Myrzakenttiń turǵyndaryna tazalyqty saqtaý mádenietin qalyptastyrý úshin túsindirý jumystaryn tynbai jasadyq. Aiyppul salý sharalaryn qolǵa aldyq. Myrzakenttiń árbir turǵyny "aýdan ortalyǵynyń turǵyny" degen atqa laiyq bolý kerektigin jáne aýdandaǵy basqa aýyldarǵa úlgi-ónege bolý kerektigin aitýdan sharashaǵan joqpyz. Árine, bizge ońai bolǵan joq. Degenmen, búgingi jasanǵan, jainaǵan, gúldengen Myrzakentti ózderińiz kórip tursyzdar, – dedi Baqyt Nasyrhanuly.
Myrzakentte kóptegen kásipkerlik nysandar da turǵyzylyp, halyqqa qyzmet kórsetý sapasy kún saiyn artýda. Kent kósheleriniń barlyǵy derlik asfalttendi. Aǵashtar egilip, jarqyrata jaryqshamdar ornatyldy. Sýburqaqtar atqylap, gúlder jaiqaldy. Myrzalardyń mekeni dep atala bastaǵan Myrzakent qai jaǵynan alsa da damyp, kórki kóz toimaityn deńgeige jetkenine BAQ ókilderi kóz jetkizdi.
