Atyraýda tórt týysynyń qazasynan keiin psihikalyq densaýlyq ortalyǵynda em qabyldaǵan Aqbaian Muqanǵalieva meditsinalyq mekemeden shyǵaryldy. Uzaq úzilisten keiin ol alǵash ret balalarymen kezdesti, dep habarlaidy dalanews.kz Tengrinews.kz-ke silteme jasap.
Bul aqparatty Atyraý oblystyq kámeletke tolmaǵandardy beiimdeý ortalyǵynyń direktory Qundyz Ǵiniiatova rastady. Onyń aitýynsha, Aqbaian balalaryn kórýge eki ret kelgen.
«Alǵash ret ótken aptada keldi. Birneshe kún buryn taǵy kelip, qaitadan 10 kúnge aýrýhanaǵa jatatynyn aitty», – dedi ortalyq basshysy.
Qazir ortalyqta áieldiń tórt balasy tárbielenip jatyr. Olardyń jastary – 10, 8, 5 jáne 4-te. Al 2025 jyly týǵan bir jarym jastaǵy kenje uly arnaiy balalar úiinde ornalastyrylǵan.
Ortalyq ókilderiniń málimetinshe, balalardyń densaýlyǵy qalypty, psihologiialyq jaǵdaiy turaqty. Mektep jasyndaǵy eki bala oqýyn jalǵastyryp jatyr. Muǵalimder ortalyqqa kelip, sabaqtardy keste boiynsha ótkizedi.
Aqbaiannyń emi áli jalǵasýy múmkin
Mamandar 10 kúndik baqylaýdan keiin áieldiń jaǵdaiyn qaita baǵalaidy. Eger nátijeler oń bolsa, Aqbaiannyń balalaryn óz qamqorlyǵyna alý múmkindigi qarastyrylýy yqtimal.
Eske salaiyq, Aqbaian Muqanǵalieva 10 naýryzda Indoneziiadan ekstraditsiialanyp, Atyraýdaǵy meditsinalyq mekemege ornalastyrylǵan bolatyn. Keiin Almatydaǵy Sot saraptamalary institýtynda psihologiialyq-psihiatriialyq saraptamadan ótti. Saraptama qorytyndysy tergeý qupiiasyna bailanysty jariialanǵan joq.
Mamyr aiynda prokýratýra áielge dinamikalyq baqylaý men qosymsha diagnostika qajet ekenin habarlaǵan.
Keiin Atyraý oblysynyń prokýratýrasy Aqbaian Muqanǵalievaǵa qatysty eki qylmystyq isti qylmys quramynyń bolmaýyna bailanysty toqtatty. Oǵan qatysty basqa qylmystyq ister tirkelmegen.
Tórt adamdy óltirgen burynǵy kúieýi ómir boiyna sottaldy
Tergeý nátijesinde Aqbaiannyń burynǵy kúieýi, 29 jastaǵy Sultan Sársemáliev tórt adamdy óltirgeni úshin kináli dep tanyldy. 14 shildede sot ony ómir boiyna bas bostandyǵynan aiyrý jazasyna kesti.
Sot barysynda er adamnyń áieldiń tórt týysyn erekshe qatygezdikpen óltirgeni dáleldendi. Tergeý deregine sáikes, qaza tapqandarǵa shamamen 60 ret pyshaq jaraqaty salynǵan.
Aqbaian Muqanǵalieva men Sultan Sársemáliev 2022 jyldyń qarashasynda resmi túrde ajyrasqan. Soǵan qaramastan, er adam keiin áiel jaldap turǵan páterge qaita kóship kelgen.
