Atyraýda internet-alaiaqtarǵa óz bank shotyn aqyly túrde paidalanýǵa bergen 63 jastaǵy er adam qylmystyq jaýapkershilikke tartyldy, dep habarlaidy dalanews.kz.
Polisia.kz málimetinshe, 2025 jyldyń kúzinde er adam áleýmettik jeliden jalǵan investitsiialyq joba týraly jarnamany kórip, jeke derekterin qaldyrǵan. Keiin ózderin qarjy uiymynyń qyzmetkeri retinde tanystyrǵan belgisiz adamdar oǵan aqsha operatsiialaryn júrgizý úshin bank shotyn ashýǵa keńes bergen.
2025 jylǵy 18 qarashada onyń esepshotyna alaiaqtardyń qurbany bolǵan Aqtóbe turǵynynan 300 myń teńge túsken. Er adam aqshanyń bir bóligin ózinde qaldyryp, qalǵanyn kúdiktiler kórsetken basqa shottarǵa aýdarǵan.
Sot barysynda aiyptalýshy kinásin tolyq moiyndap, buǵan deiin ózi de osyndai «investitsiialyq jobalardyń» kesirinen shamamen 400 myń teńgesinen aiyrylǵanyn aitqan.
Sot ony Qylmystyq kodekstiń 232-1-baby 1-bóligi boiynsha — úshinshi tulǵalarǵa paida tabý maqsatynda bank shotyn bergeni úshin kináli dep tanydy. Oǵan 20 ailyq eseptik kórsetkish kóleminde aiyppul salyndy. Sonymen qatar jábirlenýshilerge ótemaqy qoryna mindetti tólem óndirildi.
Politsiia bank kartalaryn, esepshottardy jáne jeke derekterdi bógde adamdarǵa berý qylmystyq jaýapkershilikke ákelýi múmkin ekenin eskertti. Quqyq qorǵaý organdarynyń málimetinshe, «jeńil tabys» usynatyn shemalardy alaiaqtar ózgeniń aqshasyn qolma-qol aqshaǵa ainaldyrý úshin jii paidalanady.
