Plenýmda oblystyq ardagerler keńesiniń tóraǵasy Murat Óteshov «Respýblikalyq ardagerler uiymynyń VIII seziniń sheshimderinen týyndaityn oblys ardagerler uiymdarynyń mindetteri týraly» baiandama jasady.
– Atyraý oblysynda 12 salalyq ardagerler uiymdary qurylyp, jumys isteýde, olardyń keibir býyndary aýdandarda da qurylǵan. Bul – uiymdar ár sala zeinetkerlerine sońǵy talaptar men jańalyqtardy habardar etip otyrýda, olardyń múddelerin qorǵaýda, burynǵy sala mekemelerimen bailanystaryn saqtaý isindegi óz tiimdiligin kórsetip keledi. Ásirese, bilim, densaýlyq saqtaý, temir jol, aýyl sharýashylyǵy salasyndaǵy ardagerler uiymdarynyń belsendi qyzmetin atap ketýge bolady, – dedi ol.
Sonymen qatar Murat Óteshov keńes músheleriniń budan ózge de keleli isterge alasyp, el damýyna, qoǵamnyń kemeldenýi men urpaq tárbiesine airyqsha úles qosyp jatqanyna toqtaldy. Onyń sózinshe, oblystaǵy 71 ardager búgingi tańda mediator qyzmetin atqaryp, el ishindegi otbasylyq, turmystyq daý-janjaldy sheshýge belsene aralasýda.
Jiynda sóz alǵan QR «Ardagerler uiymy» Ortalyq Keńesiniń tóraǵasy Baqtyqoja Izmuhambetov ardagerler uiymynyń 35 jyl ishinde jasaǵan eńbekterine airyqsha toqtalyp ótti.
– Osy jyldar ishinde aǵa býyn qoǵamnyń túrli salasynda elimizdiń damýyna, jastar tárbiesine úzdiksiz úlesterin qosyp keledi. Maqsattarymyzdy júzege asyrýda belsendilik tanytqan ardagerlerimiz árqashan nazarymyzda. Olardy qurmettep kelemiz. Aldaǵy ýaqytta da Sizderdiń sara joldaryńyzben júre otyryp, keiingi tolqyn úlken jetistikterge jetedi dep senim bildiremin, – dedi ol.
Óz kezeginde oblys ákimi Mahambet Dosmuhambetov oblystyq ardagerler keńesiniń qoǵamdaǵy róli men atqaryp júrgen aýqymdy isterin joǵary baǵalady.
Óz kezeginde, qalalyq jáne birqatar aýdandyq ardagerler keńesiniń tóraǵalary bul baǵyttaǵy atqarylǵan jumystarǵa toqtaldy.
Jiyn sońynda óńirdiń bir top qurmetti azamattary Baqtyqoja Izmuhambetov, Tóken Jumaǵulov, Qatimolla Rizýanov, Qairat Ishanov pen Esenaman Dabysovqa «Ardaqty ardager» ataǵy berildi.
Aita ketý kerek, oblysta barlyǵy 62 myńnan asa ardager bolsa, onyń 2 myńdaiy tyl ardageri.
