Saltanatty jiynǵa respýblikalyq Ardagerler keńesiniń tóraǵasy Baqtyqoja Izmuhambetov, Memleket jáne qoǵam qairatkeri Ravil Cherdabaev, aqyn Hanbibi Esenqaraqyzy, QR Parlamenti Senatynyń jáne Májilisiniń depýtattary Ǵumar Dúisembaev pen Dúisenbai Turǵanov, sala ardagerleri Amangeldi Selbaev pen Ǵadilbek Mýsin jáne ózge óńirlerden kelgen sondai-aq aimaqtyń ziialy qaýym ókilderi qatysty.
Aldymen oblys ákimi Mahambet Dosmuhambetov QR Prezideni Qasym-Jomart Toqaevtyń quttyqtaý hatyn oqydy.
– Ózińizdi zamandastaryńyz ómir mektebinde shyńdalyp, eńbegimen qurmetke bólengen qoǵam qairatkeri, isker azamat retinde jaqsy biledi.
Máskeýden joǵary bilim alyp, bilikti maman atanyp, týyp-ósken óńirińizde uzaq jyldar boiy jemisti jumys jasadyńyz. Munai óndirisin damytýǵa qosqan úlesińiz óte mol. Sonymen qatar, saiasi-ákimshilik qyzmetter atqaryp, Atyraý qalasynyń jáne munaily ólkeniń ekonomikalyq, áleýmettik jaǵdaiynyń jaqsarýyna bar kúsh-jigerińizdi arnadyńyz.
Zeinetkerlik demalysqa shyqqan soń da, memleketimizdiń jan-jaqty órkendeýine, el ishinde yntymaq pen tatýlyqtyń saqtalyp, halyqtyń bereke-birliginiń arta berýine atsalysyp kelesiz. Ónegeli ómirińiz keiingi jastarǵa úlgi bolmaq, – delingen quttyqtaý hatta.
Odan soń aimaq basshysy Esen Tasqynbaevtyń óńir úshin atqarǵan eleýli eńbegin aityp ótti.
– Esen Tasqynbaiulynyń óńirdiń qoǵamdyq-saiasi, ekonomikalyq jaǵynan ósip-órkendeýinde ózindik qoltańbasy bar. Prorva-Qaraton munai qubyryn qysqa merzimde turǵyzyp, munai óndirý josparyn arttyrýdaǵy eńbegin embilik munaishylar eshqashan umytpaidy. El basqarý sekildi kúrdeli salada da Esen Tasqynbaiulynyń eńbegi zor. Atyraý qalasyn 12 jyl basqaryp, qalany kórkeiýine kúsh salyp, kóptegen áleýmettik máselelerdi sheshti. Esen aǵanyń mol tájiribesi óńirdiń barsha mańyzdy salasyn jańa deńgeige kóterdi. Atap aitqanda, óndiris, aýyl sharýashylyǵy, temir jol salasy, áleýmet, qoǵam, bilim men densaýlyq, saýda sekildi baǵyttar jandandy, – degen aimaq basshysy, mereitoi iesine syi-qurmet kórsetti.
Óz kezeginde sóz alǵan respýblikalyq Ardagerler keńesiniń tóraǵasy Baqtyqoja Izmuhambetov QR Premer-Ministri Álihan Smailovtyń jáne QR Eńbek jáne halyqty áleýmettik qorǵaý ministri Serik Shápkenovtiń quttyqtaý hatyn tabystady.
Jiynda QR Parlamentiniń depýtattary Ǵ.Dúisembaev pen D.Turǵanov Senat tóraǵasy Máýlen Áshimbaev pen Májilis tóraǵasy Erlan Qoshanovtyń quttyqtaý hattaryn oqyp berdi.
Al, Memleket jáne qoǵam qairatkeri Ravil Cherdabaev mereitoi iesiniń qajirli eńbegi men azamattyq tulǵasyna toqtaldy.
– Esen aǵamyz óńirimizdiń munai salasynyń damýyna ólsheýsiz úles qosty. Oblystaǵy birneshe ken oryndaryn ashqan osy Tasqynbaiuly. Sonymen qatar, birneshe jyl jaýapty jumystardy óziniń qajyrli eńbegimen atqara otyryp, azamattyq bolmysymen orta jinai bildi. Oblystyń áleýmettik, ekonomikalyq jáne mádeni órkendeýine zor úles qosty. Onyń keleli eńbegi elenip, joǵary dárejedegi nagrattarmen marapattaldy. Aǵamyzdyń qandai jumys tapsyrsa da igerip kete beretin erekshe qasieti bar, – degen ol, Esen Tasqynbaevtyń jary Ermek Aldiiarqyzynyń da uzaq jyldar ýniversitette ustazdyq etip, kóptegen shákirt tárbielegenin de aityp ótti.
Saltanatty jiynda sala ardagerleri men úzeńgiles azamattar toi iegerine berekeli ǵumyr tilese, aqyn Hanbibi Esenqaraqyzy jyr shýmaqtaryn arnady.
Sondai-aq dokýmentaldi film kórsetilip, kontserttik baǵdarlama qatysýshylar nazaryna usynyldy.
Is-shara sońynda sóz alǵan Esen Tasqynbaev «Elimizdiń erteńi úshin istep jatqan jumystaryńyzǵa rizamyz. Al, maǵan kórsetilip jatqan qurmet – eldiń aldyndaǵy atqarǵan azamattyq boryshymnyń elengeni dep bilem»,-dei kele barlyǵyna alǵysyn bildirdi.
Aita keteiik, Esen Tasqynbaev on eki jyl qalalyq partiia komitetiniń birinshi hatshysy, on jyl boiy oblystyq atqarý komitetiniń tóraǵasy bolyp jumys istegen. Ol Atyraý oblysynyń, Atyraý qalasynyń jáne Jyloi aýdanynyń «Qurmetti azamaty». Sondai-aq «Oktiabr Revoliýtsiiasy», «Eńbek Qyzyl tý», «Halyqtar dostyǵy», «Parasat» jáne «Qurmet» ordenderiniń iegeri.
