Atyraý oblysynda bir top jas jigittiń qyzmettik mindetin atqarý kezinde politsiia qyzmetkerine shabýyl jasaǵany týraly aqparat tarady. Sondai-aq áleýmettik jelide oqiǵa ornynan kadrlar jariialandy. Bul oqiǵaǵa qatysty oblystyq PD ókilderi pikir bildirdi, dep habarlaidy Dalanews.kz
Oqiǵanyń videosy Instagram-daǵy atyrauoil.official paraqshasynda jariialanǵan edi.
Videony júktegen avtordyń habarlaýynsha, aldyn ala málimetke sáikes, bir top jigit eskertý jasaǵan politseidi soqqyǵa jyqqan.
Atyraý oblystyq politsiia departamenti oqiǵaǵa qatysty túsinikteme berdi.
"2026 jylǵy 3 sáýir kúni shamamen saǵat 22:00-de Maqat aýdanynda politsiia qyzmetkerleri qyzmettik mindetterin atqarý barysynda quqyqqa qaishy árekettiń jolyn kesti. Tekserý barysynda bir top azamattyń qarsylyq tanytyp, politsiia qyzmetkerlerine qatysty kúsh qoldanǵany anyqtaldy", - delingen PD málimdemesinde.
Oqiǵa nátijesinde eki politsiia qyzmetkeri zardap shekken.
Oqiǵaǵa qatysýshylardyń barlyǵy anyqtalyp, olarǵa qatysty protsessýaldyq sharalar qabyldanǵan. Bilik ókilderine qatysty kúsh qoldaný faktisi boiynsha "bilik ókiline qatysty qorqytý nemese kúsh qoldaný" babymen qylmystyq is tirkelgen. Qazirgi ýaqytta sotqa deiingi tergeý amaldary júrgizilip jatyr.
"Politsiia qyzmetkerlerine qatysty kez kelgen zańǵa qaishy áreketter zańdy óreskel buzý bolyp tabylatynyn jáne zańnamaǵa sáikes jaýapkershilikke ákep soǵatynyn eskertemiz", - delingen habarlamada.
Ózge aqparattar tergeý múddesine sai jariialaýǵa jatpaidy delingen resmi habarlamada.
