Erkin kúresten tuńǵysh álem chempiony Rizabek Aitmuhannyń atyna sport kesheni berildi. Atyraý qalasynda salynǵan sport ortalyǵyn kásipker, sport janashyry Arman Toǵaev qarjylandyrdy, dep habarlaidy Dalanews.kz
Jeke demeýshilerdiń qoldaýymen boi kótergen sport kesheni zamanaýi sport qurylǵylarymen jabdyqtalǵan. Atyraý qalasynda ǵy bul jańa sport ortalyǵy erkin kúresten Álem chempiony, Qazaqstan chempiony Rizabek Aitmuhan esimimen atalady.
Ashylý saltanatyna kóptegen kúres áleminiń sheberleri, sportqa eńbek sińirgen memleket jáne qoǵam qairatkerleri arnaiy qatysty. QR Májilis depýtaty, Olimpiada júldegerleri Dáýlet Turlyhanov quttyqtaýyn jetkizip, sport janashyrlaryna alǵysyn bildirdi.
Ol Atyraý halqy úshin jastardyń bolashaǵy úshin shyn júrekten qýanatynyn jáne basqa óńirler de osy bir bastamany qoldaitynyna senim bildirdi.
Grek-Rim jáne Erkin kúresten Álem birinshilikterimen, Aziia jáne olimpiada oiyndarynyń jeńimpazdary men júldegerleri de ashylý saltanatyna qatysty. Olardyń sapynda Iýrii Melnichenko, Demeý Jadyraev, Nurqoja Qaipanov, Aidos Sultanǵali, Rizabek Aitmuhan, Bolat Saqaev, Dáýlet Niiazbekov siiaqty boz kilem sheberleri kelip jobany qoldap, shyn júrekten qýanyp qaitty.
“Men shynymen de qýanyshtymyn, sebebi elimizde bundai jobalar az. Osyndai sport keshenderi damyp, taǵy da kóptegen chempiondarymyzdy tárbieleitin sport nysandary salyna bersin. Bul rasynda da bolashaq chempiondardy damytýǵa óz septigin tigizgeli tur. Atyraý halqy úshin dán rizamyn”,- dedi Olimpiada júldegeri Demeý Jadyraev.
“Men bul sport keshenniń salynǵana óte qatty qýandym jáne qoldap kelgen jáne ony salýǵa atsalysqan aǵalarǵa rahmetimdi aitamyn. Aitaiyn degenim, 2023 jyly men chempion bolyp kelgenimde Arman Toǵaev aǵam meni Atyraýǵa shaqyrtyp el aldynda: “Sen erkin kúresten tuńǵysh chempionsyń, amandyq bolsa seniń atyńa sport keshenin saldyrtamyn” degen. Mine sol ýádesinde turyp, osyndai kúres akademiiasyn ashty”,- deidi Rizabek Aitmuhan.
Sport janashyry Arman Toǵaev bolashaq josparlaryn ortaǵa saldy. Ol bul tek bastamasy, elimizdiń ár buryshynan osyndai keshender salý oiymyzda bar, dedi. Al Dáýlet Turlyhanov ortalyqqa avtobýs syilaitynyn aitty.
Dinasyl Hamit
