Oqý-aǵartý mınıstrligi Atyraý oblysynda 9 jastaǵy qyzdan jyn shyǵarmaq bolǵan emshiniń oqıǵasyna baılanysty málimdeme jasady, dep habarlaıdy Dalanews.kz.

Mınıstrlik atalǵan jaıt úlken alańdaýshylyq týdyrǵanyn erekshe atap ótti.

“Atyraý oblysynda bolǵan oqıǵaǵa beı-jaı qaraýǵa bolmaıdy. QR Oqý-aǵartý mınıstrligi Balalardyń quqyqtaryn qorǵaý komıteti bul jaǵdaıdy óz baqylaýyna aldy”, – dep habarlady mınıstrliktiń Balalar quqyqtaryn qorǵaý komıtetiniń baspasóz qyzmeti.

Vedomstvonyń málimetinshe, qazirgi ýaqytta balaǵa qajetti kómek, sonyń ishinde kásibı psıhologıalyq qoldaý kórsetilip jatyr. Sonymen qatar oqıǵa ornynda balalar quqyqtary jónindegi aımaqtyq ýákil jumys istep jatyr.

“Bala densaýlyǵy men ál-aýqatyna qaýip tóndiretin kez kelgen áreketke jol berilmeıtinin erekshe atap ótken jón. Mınıstrlik balalardyń quqyqtaryn qorǵaýǵa baǵyttalǵan zańdar men normalardy qatań saqtaý qajettigin eske salady”, – dep qorytyndylady komıtet ókilderi.

Eske salaıyq, buǵan deıin áleýmettik jelide kishkentaı qyzdan “jyn shyǵaryp“ jatqan vıdeo tarady. Bul másele quzyrly organdardyń nazaryn aýdartty.

Kadrlarda er adam qyzdyń esimin, jynysyn, ne úshin kirgenin, kim jibergenin, jasyn suraıdy.

“19-daǵy Lázzat, myń jyldyqsyń ba, júz jyldyqsyń ba? İshińde nesheý?” — dep suraıdy er adam kishkentaı qyzdan.

Vıdeoda qyz suraqtarǵa jaýap berip, jylap jatqany kórinedi.

BAQ pen jelide vıdeodaǵy emshiniń esimi Keıqýat Ospanov ekeni aıtylady.

Máselege Bala quqyqtary jónindegi ýákil Dınara Zákıeva pikir bildirdi.

“Emshi kámeletke tolmaǵan balaǵa rásim jasaǵan beınejazbaǵa qatysty. Atalmysh is boıynsha İİM, óńirlik ýákildermen jumys istep jatyrmyz. Emshiniń jeke basy men balanyń turyp jatqan jeri aldyn ala anyqtaldy. Aqparat tekserilip, mán-jaı anyqtalýda”, — dedi ol.