Áleýmettik jelide Atyraý qalasy ákimdiginiń qyzmetkerine qatysty video tarap ketti. Jelide taraǵan aqparatta Atyraý oblysyn sý basyp jatqan kezde ákimdik qyzmetkerleriniń biri qyzmettik kóligimen qala aralap, ózine jańa Toyota tańdap júrgeni aitylady.
Bul jaitqa qala ákimdiginiń baspasóz qyzmeti ókilderi jaýap berdi, - dep habarlaidy Dalanews.kz.
"Ákimdik qyzmetkeri halyqtyń jaǵdaiyn oilap qatty qinalyp júr", - dep jazylǵan jelide taraǵan videoda.
Jergilikti basylymdar málimetine súiensek, video avtory jergilikti bloger ekeni belgili bolǵan. Ol kadr syrtynda ákimdik qyzmetkeri 013 RK 06 memlekettik nómirli avtokólikpen kelgenin aityp, Toyota ortalyǵynda video túsiredi. Sonymen qatar, qyzmetkerden ne istep júrgenin suraidy. Qyzmetker "jumysta júrmin", - dep jaýap beredi.
"Qala sýǵa keteiin dep jatyr deidi. Barlyǵy jumys istep jatyr. Mynaý ishki saiasattyń mashinasy ǵoi akimattaǵy. Toiota ortalyǵynda ne istep júr eken? Mashina qarap júr. Qala sýǵa keteiin dep jatyr, mashina qarap júrsińder, qalai túsinemiz?" - deidi video avtory.
Jelide video tarap ketkennen keiin Atyraý qalasy ákimdigi ókilderi pikir bildirdi.
"Atyraý qalasy ákimdiginiń qyzmetkeri ákimdik balansyndaǵy "Toyota" markaly kólikterin jóndeýden ótkizý maqsatynda resmi dilerden qosalqy bólshekterdiń baǵasyn bilip, tapsyrys berýge barǵan", - dedi qalalyq ákimdiktiń baspasóz qyzmeti ókili "Aq Jaiyq" basylymyna bergen jaýabynda.
Aita keteiik, Atyraý oblysy Jylyoi aýdany Qulsary qalasynda 3 myńǵa jýyq úi sý astynda qaldy.
Aldyn ala boljam boiynsha, Qulsary qalasynda 2810 turǵyn úi sý astynda qaldy. Bul - Qazaqstannyń Tótenshe jaǵdailar ministrligi keltirgen derek.
Sý tasqynyń saldaryn joiýǵa 231 tehnika, 1198 jeke quram, 18 birlik júzý quraldary, 19 birlik motopompa jumyldyryldy.
