Oblys ákiminiń sózinshe, halyqty koronavırýstyq ınfeksıadan qorǵaý úshin aýqymdy jumystar istelýde. Aımaq basshysy pandemıaǵa qaramastan ónerkásiptik óndiris damyp, áleýmettik máseleler sheshimin taýyp jatqanyn aıtty. Oblystaǵy jalpy óńirlik ónim 2020 jyldyń qorytyndysy boıynsha 7 trln. teńgeni quraǵan. Al, shaǵyn jáne orta kásipkerlik sýbektileriniń shyǵarǵan ónimi 2,1 trln. teńgege jetti. Iaǵnı Atyraý oblysy bul rette respýblıka boıynsha Almaty men Nur-Sultan qalalarynan keıingi orynda tur.
Oblys ákimi Mahambet Dosmuhambetov baıandamasynda ekonomıkaǵa serpin beretin iri jobalardyń qolǵa alynatynyn jetkizdi. 2025 jylǵa deıin 8,7 trln. teńgeniń ınvestısıalyq pýl jobalary jasaqtalǵan. Munaı óndirý 28,5% paıyzǵa artyp, jylyna 60 mln. tonnaǵa jetpek. Agrarlyq sektorda 23, al balyq sharýashylyǵy salasynda 9 ınvestısıalyq jobany júzege asyrý josparlanyp otyr. Ekologıalyq máselelerdi sheshý úshin oblys ákimdigi Ekologıa, geologıa jáne tabıǵı resýrstar mınıstrligimen birlesip byltyr «Jol kartasyn» qabyldady. Josparǵa sáıkes, 5 jyl ishinde óńirdiń iri munaı-gaz kásiporyndarymen birlese otyryp 7 mıllıon kóshet, al, eldi mekenderde 540 myń kóshet otyrǵyzý josparlanýda.
Mahambet Joldasqalıuly sonymen qatar Prezıdentke turǵyndardy mazalaıtyn jáne aımaqtyń odan ári damýyna qolbaılaý bolatyn eń ózekti problemalar men olardy sheshýge qatysty usynystaryn aıtty.
Qazir óńirde tushshy sý tapshylyǵy ótkir tur. Jaıyqtyń tartylýy men Oıyl, Jem jáne Saǵyz ózenderiniń sýalýy taǵy bar. Atyraý men aýdandardyń keı bóliginde jol joq, bary kóńil kónshitpeıdi. Elektr energıasy salasyndaǵy problemalar shuǵyl sheshýdi qajet etedi. Áleýmettik salalarda da sheshimin kútken máseleler bar. Olardyń barlyǵyn jan-jaqty baıandaǵan oblys ákimi: «Qurmetti Qasym-Jomart Kemeluly, biz aımaqtyń damý baǵytyn saralap, bar problemalardyń sheshý joldaryn usynyp otyrmyz. Sizden osy bastamalarǵa qoldaý kórsetip sheshim qabyldaýǵa yqpal etýińizdi suraımyz», – dedi.
Óz kezeginde Qasym-Jomart Toqaev aımaqty damytýǵa qatysty naqty jeti mindetke toqtaldy. Olar – munaı-gaz ónerkásibin jáne avtojoldardy damytý, jumyspen qamtý, densaýlyq saqtaý júıesin nyǵaıtý, oblysty turaqty energıamen, sýmen qamtamasyz etý jáne óńirdiń ekologıasy.
Keńes sońynda memleket basshysy «Saraıshyqtyń mańyzdylyǵy men tanymaldyǵyn arttyrý úshin zamanaýı týrızm ınfraqurylymy qajet. Ákimdik Úkimetten vızıt-ortalyq qurylysyna qarajat suraǵan eken. Biraq, kelisimin áli almaǵan. Úkimetke osy máseleni dereý sheshýdi tapsyramyn», – dedi. Ol sondaı-aq tapsyrmasyna sáıkes, Atyraý oblysynyń 2025 jylǵa deıingi áleýmettik-ekonomıkalyq damýy týraly keshendi jospardyń jobasy daıyndalǵanyn atap ótti. Soǵan sáıkes 23 myń oqýshyǵa arnalǵan 37 jańa mektep salynady. Sol arqyly úsh aýysymda oqytý jáne mektepterdegi oryn tapshylyǵy máselesi tolyq sheshiledi.
– Jergilikti turǵyndarǵa sapaly medısınalyq kómek kórsetý úshin birqatar nysannyń qurylysy bastalady. Atap aıtqanda, kóp beıindi aýrýhana, eki emhana, psıhıkalyq densaýlyq ortalyǵy, Atyraý qalasyndaǵy onkologıalyq dıspanser janynan radıologıalyq korpýs, sondaı-aq aýyldyq jerlerde alǵashqy dárigerlik-sanıtarlyq kómek kórsetetin 9 nysan boı kóteredi, – degen Prezıdent múmkindigi shekteýli balalar úshin ońaltý ortalyǵy salynatynyn aıtty.
Sondaı-aq keshendi josparǵa saı 3,5 mıllıon sharshy metr turǵyn úı paıdalanýǵa berilip, 25 myń atyraýlyq otbasy baspanaly bolady.
– Keshendi jospardyń júzege asyrylýy ónerkásipti, agroónerkásip keshenin, týrızm salasyn damytý, energetıka jáne ekologıa salasyndaǵy aımaqta qordalanǵan máselelerdi sheshýge múmkindik beredi. Ony iske asyrý úshin 9 trıllıon teńgege jýyq ınvestısıa tartylmaq, kóbi – jeke ınvestısıa. Sonymen qatar, josparǵa sáıkes búdjetten 800 mıllıard teńgeden astam qarajat bólý kózdelip otyr. Sonyń 700 mıllıardqa jýyǵy respýblıkalyq búdjetten qarastyrylady, – degen memleket basshysy Úkimetke jospardy tolyqtyryp, bir aıdyń ishinde bekitýdi tapsyrdy.
Basty maqsat – halyqtyń turmys sapasyn jáne ál-aýqatyn arttyrý ekenin atap ótken Prezıdent Qasym-Jomart Toqaev: «óńirdiń damý barysyn jáne barlyq máselelerdiń ýaqtyly sheshilýin ózim tikeleı baqylaýda ustaımyn», – dep sózin túıindedi.
Keńeste sondaı-aq, Premer-Mınıstrdiń orynbasary Roman Sklár, «Samuryq-Qazyna» UÁQ» AQ Basqarma tóraǵasy Almasadam Sátqalıev, Energetıka mınıstri Nurlan Noǵaev, Ekologıa, geologıa jáne tabıǵı resýrstar mınıstri Maǵzum Myrzaǵalıev baıandama jasady.
