Atyraý oblysynda jergilikti búdjet kirisi 20 mlrd teńgege artyq oryndalǵan. Bul jaıynda oblystyq máslıhattyń 2 sesıasynda Atyraý oblysy boıynsha Memlekettik kirister departamenti basshysynyń orynbasary málim etti, – dep habarlaıdy Dalanews.kz Atyraý oblysy boıynsha komýnıkasıalar qyzmetine silteme jasap.

Otyrysqa aımaq basshysy Mahambet Dosmuhambetov, oblystyq máslıhat depýtattary, qoǵamdyq keńes tóraǵasy, basqarma basshylary, onlaın rejımde aýdan ákimderi qatysty.

– Jergilikti búdjet boıynsha boljam 350,4 mlrd teńge bolsa, 371,1 mlrd tenge kóleminde naqty tólem túsip, boljam 20,7 mlrd teńgege nemese 105,9 paıyzǵa artyǵymen oryndaldy, – dedi Atyraý oblysy boıynsha Memlekettik kirister departamenti basshysynyń orynbasary Beken Shanaev.

Sondaı-aq, pandemıaǵa baılanysty 187 myńǵa jýyq qyzmetkeri bar shaǵyn jáne orta bıznestiń 12 myńǵa jýyq salyq tóleýshileri ustalatyn salyqtar men áleýmettik tólemderden bosatylǵan.

Sonymen qatar, B.Shanaev Departamentpen 953 079 memlekettik qyzmet kórsetilse, onyń 928 162 nemese 97,4 paıyzy elektrondy túrde usynylǵanyn jetkizdi.

Jıyn sońynda óńir basshysy Mahambet Dosmuhambetov «ár qabyldanǵan sheshim jumysty ári qaraı jandandyrýǵa oń yqpal etetinin, josparlanǵan jumystar óz ýaqytynda jáne sapaly oryndalý qajettigin» basa aıtty.