Partiia tóraǵasy Aiqyn Qońyrovtyń aitýynsha bul kommýnistik ideologiiamen at-quiryǵyn úzisýdi bildirmeidi. Partiianyń aty ózgergenmen, zaty ózgermeidi.
Qońyrovtyń pikirinshe Batys propagandasy adamnyń miyn shaiyp, kommýnizmge qorqa qaraityn orta qalyptastyrǵan. Sonyń saldarynan Qazaqstan kommýnisteriniń qol-aiaǵy bailanyp, saiasi-áleýmettik jobalary men usynystary qalqada qalǵan.
«Saiasi uiym elektorattyń aryz-talabyn eskerýi kerek. Partiianyń atyn ózgertý týraly sheshimge keldik. Áitse de ideologiiadan attap ketpeimiz. Pozitsiiamyz sol kúiinde qalmaq. Sotsialistik ideiaǵa adalmyz. Partiia tuǵyrnamasy osy ideianyń tóńiregine toptasady», – degen-tuǵyn Aiqyn myrza.
Ataýyn ózgertken «kommýnister» qoǵamda ádildik pen teńdik ornatýdy ańsaitynyn aitady. «Halyq partiiasy» Úkimet pen «Nur Otannan» úmit úzgen aýditoriiany ózine qaratyp, Parlamentten kóbirek oryn alýdy kózdep otyr.
Qońyrov partiianyń 7 paiyzdyq mejeden mizemei óterine senimdi.
«Áleýmettik máselege qumbyl kóńil bólsek, áleýmettiń nazaryn ózimizge buramyz. Shainap bergen dúnie as bolmaidy. Munaidy maldanǵan bilik, aýzyn qý shóppen súrtip otyr. «Shyqpa janym, shyqpa» deitin shyrǵalań zaman kele jatyr».
...
Sói degen Qońyrov «Halyq partiiasynyń» jańa logotipin jurt kózine kórsetip, uiymnyń eski de jańa múshelerine tanystarǵan.
Dalanews.kz bul belgini bir jerden kórgendei.
Redaktsiia bes saýsaq bir judyryqqa jumylǵan jańa simvolikanyń shyǵý tegin anyqtaýǵa tyrysqanymen, partiia basshylyǵynan mardymdy jaýap ala almady.
Qońyrovtyń aitýynsha jańa logotip jer-jihandaǵy proletariat birligin bildiredi eken. Partiia tóraǵasy simvolika tańdaýǵa kelgende qatelespegenine senimdi.
Partiianyń jańa logotipi atyshýly Ábliazov pen onyń jaqtastarynyń «judyryq túiisine» uqsamai ma osy?
«Judyryq túiý» tutastai alǵanda búgingi júiege qarsylyq simvoly retinde qabyldanyp júrgeninen «Halyq partiiasy» habardar ma eken?
Álde buǵan bile tura bardy ma? Bálkim tóbe jaqtan túsken tapsyrma sondai bolar?..
Bul simvolikany áýelden Ábliazovpen bailanystyryp, bilikke qarsy kúshterdi «bir judyryqqa jumylýǵa» úndeitin belgi ekenin saiasi saýatty aýditoriia jaqsy biledi.
Dýlat Aǵadilge ornatylǵan qulpytas ta osydan habar bergendei. Marqum judyryq túiip tur...
Soǵan qaraǵanda «Halyq partiiasy» da júiege judyryǵyn bilep, aldaǵy sailaýda bilik partiiasyn attan aýdarýdy kózdep otyrǵandai.
...
Buǵan deiin Aiqyn Qońyrov Qazaqstanda aýqymdy nesielik raqymshylyq júrgizýdi usynǵan.
«Eger buryn halyq nesieni turmystyq tehnika, kiim-keshek pen toi-tomalaqqa alsa, endi burynǵy kreditterin jabý úshin, balalaryn oqytý, emdelý men tamaq jeý úshin jańa kreditter alyp jatyr.
Nesie tólemderin shegeretin prezidenttik moratorii osy qyrkúiek aiynda aiaqtalady, al nesie alǵandardyń tólem qabilettigin qalpyna keltire alýy ekitalai», – degen edi partiia tóraǵasy.
Álemjelidegi jurt Qońyrovtyń bul bastamany bilik opponenti Janbolat Mamaidan aina-qatesiz kóshirip kóshirip alǵanyn aitqan.
Sonyń aldynda Qazaqstandaǵy "Demokratiialyq partiia" qurý jónindegi bastamashyl toptyń jetekshisi, saiasatker Janbolat Mamai bilikke ún qatyp, qazirgidei qysyltaiań shaqta júdep-jadaǵan jurttyń nesiesin keshirip, keńshilik jasaýǵa úndegen.
Mamai bastaǵan jurt Nur-Sultanǵa baryp, nesieni keshirý týraly 97 myń adam qol qoiǵan bir qushaq qaǵazdy Aqordaǵa tapsyrǵan-tuǵyn.
...
Aiqyn Qońyrovtyń partiia ataýy men logotipin ózgertip jibergenine osy uiymnyń beldi múshesi Vladislav Kosarev úzildi-kesildi qarsy. Alaida qoldan keler qairan joq.
Kosarev bólek kommýnistik partiia qurýǵa kirisip ketti. Onyń aitýynsha, partiia ataýynan kommýnistik sózin alyp tastaý úlken qatelik.
«Áriptesterim partiiamyzdyń ataýyndaǵy kommýnistik sózin alyp tastai otyryp, keshirýge kelmeitin saiasi qatelik jasady. Sol áreketterimen meni satyp ketti dese bolady. Jalpy Kommýnister partiiasynyń parlamentke enýine aianbai ter tóktim. Endi sony joqqa shyǵarmaq. Ári parlamenttegi oryndarynan aiyrylyp qalmaý úshin, áldebireýlerge unamaityn kommýnizm sózinen bas tartyp otyr», – deidi ol.
Printsipshil Kosarev partiia partiia músheleriniń basym bóligi rebrendingti qoldaǵanyna senbeidi.
Al Halyq partiiasynyń habarlaýynsha, Kosarevke partiiadan shyǵý týraly resmi ótinish túspegen. Eger partiiadan shyǵar bolsa, mandatynan aiyrylyp, májilistegi ornyn bosatýǵa mindettelmek.
...
Uiymnyń qazirgi tóraǵasy Aiqyn Qońyrov birqatar popýlistik málimdemesimen kózge túsken.
Birneshe jyl buryn Qońyrov nan baǵasyn 300 teńgege kóterý kerektigin aitqan. Onyń pikirinshe, halyq sonda ǵana nannyń qadirine jetetin bolady.
«Halyqqa azyq-túlikti talonmen taratý kerek» degen de osy kisi. Premer Máminge saýal joldaǵan depýtat keńes úkimetindegi kýpondyq tólemniń artyqshylyqtaryn jipke tizip bergen. Májilismenniń sózinshe, halyqqa azyq-túlikti talonmen taratý sóredegi qymbatshylyqtyń aldyn-alady-mys.
Partiianyń artyq qylam dep, tyrtyq qylǵan tustary da kóp. Sonyń biri zeinet shyǵý jasyna qatysty. "Halyqtyq kommýnister" fraktsiiasy depýtattarynyń zeinet jasyn tómendetý týraly usynysyna jaýap bergen Mámin Úkimettiń kerisinshe zeinetkerlik jasty ulǵaitýdy josparlap otyrǵanyn aitqan.
Ázirlegen, Dýman BYQAI
