پارتيا ءتوراعاسى ايقىن قوڭىروۆتىڭ ايتۋىنشا بۇل كوممۋنيستىك يدەولوگيامەن ات-قۇيرىعىن ءۇزىسۋدى بىلدىرمەيدى. پارتيانىڭ اتى وزگەرگەنمەن، زاتى وزگەرمەيدى.
قوڭىروۆتىڭ پىكىرىنشە باتىس پروپاگانداسى ادامنىڭ ميىن شايىپ، كوممۋنيزمگە قورقا قارايتىن ورتا قالىپتاستىرعان. سونىڭ سالدارىنان قازاقستان كوممۋنيستەرىنىڭ قول-اياعى بايلانىپ، ساياسي-الەۋمەتتىك جوبالارى مەن ۇسىنىستارى قالقادا قالعان.
«ساياسي ۇيىم ەلەكتوراتتىڭ ارىز-تالابىن ەسكەرۋى كەرەك. پارتيانىڭ اتىن وزگەرتۋ تۋرالى شەشىمگە كەلدىك. ايتسە دە يدەولوگيادان اتتاپ كەتپەيمىز. پوزيسيامىز سول كۇيىندە قالماق. سوسياليستىك يدەياعا ادالمىز. پارتيا تۇعىرناماسى وسى يدەيانىڭ توڭىرەگىنە توپتاسادى»، – دەگەن-تۇعىن ايقىن مىرزا.
اتاۋىن وزگەرتكەن «كوممۋنيستەر» قوعامدا ادىلدىك پەن تەڭدىك ورناتۋدى اڭسايتىنىن ايتادى. «حالىق پارتياسى» ۇكىمەت پەن «نۇر وتاننان» ءۇمىت ۇزگەن اۋديتوريانى وزىنە قاراتىپ، پارلامەنتتەن كوبىرەك ورىن الۋدى كوزدەپ وتىر.
قوڭىروۆ پارتيانىڭ 7 پايىزدىق مەجەدەن ميزەمەي وتەرىنە سەنىمدى.
«الەۋمەتتىك ماسەلەگە قۇمبىل كوڭىل بولسەك، الەۋمەتتىڭ نازارىن وزىمىزگە بۇرامىز. شايناپ بەرگەن دۇنيە اس بولمايدى. مۇنايدى مالدانعان بيلىك، اۋزىن قۋ شوپپەن ءسۇرتىپ وتىر. «شىقپا جانىم، شىقپا» دەيتىن شىرعالاڭ زامان كەلە جاتىر».
...
ءسوي دەگەن قوڭىروۆ «حالىق پارتياسىنىڭ» جاڭا لوگوتيپىن جۇرت كوزىنە كورسەتىپ، ۇيىمنىڭ ەسكى دە جاڭا مۇشەلەرىنە تانىستارعان.
Dalanews.kz بۇل بەلگىنى ءبىر جەردەن كورگەندەي.
رەداكسيا بەس ساۋساق ءبىر جۇدىرىققا جۇمىلعان جاڭا سيمۆوليكانىڭ شىعۋ تەگىن انىقتاۋعا تىرىسقانىمەن، پارتيا باسشىلىعىنان ماردىمدى جاۋاپ الا المادى.
قوڭىروۆتىڭ ايتۋىنشا جاڭا لوگوتيپ جەر-جيھانداعى پرولەتاريات بىرلىگىن بىلدىرەدى ەكەن. پارتيا ءتوراعاسى سيمۆوليكا تاڭداۋعا كەلگەندە قاتەلەسپەگەنىنە سەنىمدى.
پارتيانىڭ جاڭا لوگوتيپى اتىشۋلى ءابليازوۆ پەن ونىڭ جاقتاستارىنىڭ «جۇدىرىق تۇيىسىنە» ۇقساماي ما وسى؟
«جۇدىرىق ءتۇيۋ» تۇتاستاي العاندا بۇگىنگى جۇيەگە قارسىلىق سيمۆولى رەتىندە قابىلدانىپ جۇرگەنىنەن «حالىق پارتياسى» حاباردار ما ەكەن؟
الدە بۇعان بىلە تۇرا باردى ما؟ بالكىم توبە جاقتان تۇسكەن تاپسىرما سونداي بولار؟..
بۇل سيمۆوليكانى اۋەلدەن ابليازوۆپەن بايلانىستىرىپ، بيلىككە قارسى كۇشتەردى «ءبىر جۇدىرىققا جۇمىلۋعا» ۇندەيتىن بەلگى ەكەنىن ساياسي ساۋاتتى اۋديتوريا جاقسى بىلەدى.
دۋلات اعادىلگە ورناتىلعان قۇلپىتاس تا وسىدان حابار بەرگەندەي. مارقۇم جۇدىرىق ءتۇيىپ تۇر...
سوعان قاراعاندا «حالىق پارتياسى» دا جۇيەگە جۇدىرىعىن بىلەپ، الداعى سايلاۋدا بيلىك پارتياسىن اتتان اۋدارۋدى كوزدەپ وتىرعانداي.
...
بۇعان دەيىن ايقىن قوڭىروۆ قازاقستاندا اۋقىمدى نەسيەلىك راقىمشىلىق جۇرگىزۋدى ۇسىنعان.
«ەگەر بۇرىن حالىق نەسيەنى تۇرمىستىق تەحنيكا، كيىم-كەشەك پەن توي-تومالاققا السا، ەندى بۇرىنعى كرەديتتەرىن جابۋ ءۇشىن، بالالارىن وقىتۋ، ەمدەلۋ مەن تاماق جەۋ ءۇشىن جاڭا كرەديتتەر الىپ جاتىر.
نەسيە تولەمدەرىن شەگەرەتىن پرەزيدەنتتىك موراتوريي وسى قىركۇيەك ايىندا اياقتالادى، ال نەسيە العانداردىڭ تولەم قابىلەتتىگىن قالپىنا كەلتىرە الۋى ەكىتالاي»، – دەگەن ەدى پارتيا ءتوراعاسى.
الەمجەلىدەگى جۇرت قوڭىروۆتىڭ بۇل باستامانى بيلىك وپپونەنتى جانبولات مامايدان اينا-قاتەسىز كوشىرىپ كوشىرىپ العانىن ايتقان.
سونىڭ الدىندا قازاقستانداعى "دەموكراتيالىق پارتيا" قۇرۋ جونىندەگى باستاماشىل توپتىڭ جەتەكشىسى، ساياساتكەر جانبولات ماماي بيلىككە ءۇن قاتىپ، قازىرگىدەي قىسىلتاياڭ شاقتا جۇدەپ-جاداعان جۇرتتىڭ نەسيەسىن كەشىرىپ، كەڭشىلىك جاساۋعا ۇندەگەن.
ماماي باستاعان جۇرت نۇر-سۇلتانعا بارىپ، نەسيەنى كەشىرۋ تۋرالى 97 مىڭ ادام قول قويعان ءبىر قۇشاق قاعازدى اقورداعا تاپسىرعان-تۇعىن.
...
ايقىن قوڭىروۆتىڭ پارتيا اتاۋى مەن لوگوتيپىن وزگەرتىپ جىبەرگەنىنە وسى ۇيىمنىڭ بەلدى مۇشەسى ۆلاديسلاۆ كوساريەۆ ۇزىلدى-كەسىلدى قارسى. الايدا قولدان كەلەر قايران جوق.
كوساريەۆ بولەك كوممۋنيستىك پارتيا قۇرۋعا كىرىسىپ كەتتى. ونىڭ ايتۋىنشا، پارتيا اتاۋىنان كوممۋنيستىك ءسوزىن الىپ تاستاۋ ۇلكەن قاتەلىك.
«ارىپتەستەرىم پارتيامىزدىڭ اتاۋىنداعى كوممۋنيستىك ءسوزىن الىپ تاستاي وتىرىپ، كەشىرۋگە كەلمەيتىن ساياسي قاتەلىك جاسادى. سول ارەكەتتەرىمەن مەنى ساتىپ كەتتى دەسە بولادى. جالپى كوممۋنيستەر پارتياسىنىڭ پارلامەنتكە ەنۋىنە ايانباي تەر توكتىم. ەندى سونى جوققا شىعارماق. ءارى پارلامەنتتەگى ورىندارىنان ايىرىلىپ قالماۋ ءۇشىن، الدەبىرەۋلەرگە ۇنامايتىن كوممۋنيزم سوزىنەن باس تارتىپ وتىر»، – دەيدى ول.
ءپرينسيپشىل كوساريەۆ پارتيا پارتيا مۇشەلەرىنىڭ باسىم بولىگى رەبرەندينگتى قولداعانىنا سەنبەيدى.
ال حالىق پارتياسىنىڭ حابارلاۋىنشا، كوساريەۆكە پارتيادان شىعۋ تۋرالى رەسمي ءوتىنىش تۇسپەگەن. ەگەر پارتيادان شىعار بولسا، مانداتىنان ايىرىلىپ، ماجىلىستەگى ورنىن بوساتۋعا مىندەتتەلمەك.
...
ۇيىمنىڭ قازىرگى ءتوراعاسى ايقىن قوڭىروۆ ءبىرقاتار پوپۋليستىك مالىمدەمەسىمەن كوزگە تۇسكەن.
بىرنەشە جىل بۇرىن قوڭىروۆ نان باعاسىن 300 تەڭگەگە كوتەرۋ كەرەكتىگىن ايتقان. ونىڭ پىكىرىنشە، حالىق سوندا عانا ناننىڭ قادىرىنە جەتەتىن بولادى.
«حالىققا ازىق-تۇلىكتى تالونمەن تاراتۋ كەرەك» دەگەن دە وسى كىسى. پرەمەر مامينگە ساۋال جولداعان دەپۋتات كەڭەس ۇكىمەتىندەگى كۋپوندىق تولەمنىڭ ارتىقشىلىقتارىن جىپكە ءتىزىپ بەرگەن. ماجىلىسمەننىڭ سوزىنشە، حالىققا ازىق-تۇلىكتى تالونمەن تاراتۋ سورەدەگى قىمباتشىلىقتىڭ الدىن-الادى-مىس.
پارتيانىڭ ارتىق قىلام دەپ، تىرتىق قىلعان تۇستارى دا كوپ. سونىڭ ءبىرى زەينەت شىعۋ جاسىنا قاتىستى. "حالىقتىق كوممۋنيستەر" فراكسياسى دەپۋتاتتارىنىڭ زەينەت جاسىن تومەندەتۋ تۋرالى ۇسىنىسىنا جاۋاپ بەرگەن ءمامين ۇكىمەتتىڭ كەرىسىنشە زەينەتكەرلىك جاستى ۇلعايتۋدى جوسپارلاپ وتىرعانىن ايتقان.
ازىرلەگەن، دۋمان بىقاي
