Piknik negizgi "Aziia daýysy" kontserti aldyndaǵy shara edi. Endi aldaǵy 28-30 shilde kúnderi "Medeý" shatqalynda aty ańyzǵa ainalǵan «Aziia daýysy» festivali jalǵasyn tappaq.
«Aziia daýysy» piknigi shynaiy serýenge negizdeldi. Atap aitatyn bolsaq, dámdi taǵamdar qoiylyp, demeýshiler tarapynan kóptegen túrli oiyndar, sheberlik sabaqtary ótti. Eń bastysy - ásem áýen shyrqaldy.
«Medeý» sahnasynda tańnyń atysynan kúnniń batysyna deiin Almaty qalasynda ótken «Jas qanat-2023» jas oryndaýshylar baiqaýynyń qatysýshylary men júldeli oryn iegerleri óner kórsetti.
Qoiylym arasynda úlken ekrannan «Aziia daýysy» festivalinen beinerolikter kórsetildi. Uiymdastyrýshylar piknik qonaqtarymen osydan 30 jyl buryn óner kórsetken juldyzdardy eske aldy. Halyq qosylyp án aityp, bi biledi. Bul - saǵynyshqa toly sátter boldy! Al piknik keshin kópshiliktiń súiiktisine ainalǵan Moldanazar, Sadraddin jáne PLEBS toby tamasha án shashýlarymen qorytyndylady.
«Aziia daýysy» piknigi – jańasha kózqarasta qaita jalǵasyn tabatyn «Aziia daýysy» festivaliniń tusaýkeseri retinde atalyp ótti. Festivaldiń bas prodiýseri Armanjan Baitasov "Biz úshin piknik – óte mańyzdy oqiǵalardyń biri. Jyl basynda «Aziia daýysy» festivaline daiyndyq barysynda «Aziia daýysy» halyqaralyq festivali qoǵamdyq qorynyń negizin qalaýshy jáne prezidenti Irina Kovyriako is-sharanyń tolyq nusqasyn oilastyrdy. Sonyń biri Almatyǵa keri qaitarýymyz kerek bolǵan «Jas qanat» baiqaýy. Sonymen qatar, Aziia daýysynyń simvolyna ainalǵan kún basqan erlerdiń beinesi tabylǵan Tańbalydaǵy petroglifterge saiahat edi. Bulardyń barlyǵy bir tizbektiń býyny. «Aziia daýysy» festivali men baiqaýy 20 jylǵa jýyq ýaqyt ótkizilmedi. Sońǵy festival 2004 jyly ótti. Arada uzaq úzilis bolǵandyqtan, kóp nárse umytylyp ketti. Sondyqtan bárin qaita qalpyna keltirýge týra keledi", - dedi.
"Osy tusta festivaldi bastapqyda jasaýǵa atsalysqan Murat Irǵaliev jáne Aleksandr Ponomarevpen qaita qarym-qatynas quryp, jumysty jalǵastyramyz. Bul komandamen 2004 jyly jumys istegen kezde iPhone, smartfon, iPad, tipti 5G interneti de bolǵan joq. Iaǵni, búgingidei múmkindikter bolmady. Bizdiń mindetimiz – bar qabiletimizdi, múmkindigimizdi, shyǵarmashylyǵymyzdy biriktire otyryp, «Aziia daýysyn» zaman talabyna sai etip daiyndap shyǵý. Bul - árine, ońai emes. Biz barlyq is-sharany joǵary deńgeide uiymdastyrýǵa tyrysamyz. Osy tusta, 28, 29 jáne 30 shilde Medeýde ótetin «Aziia daýysy» festivali kórermen kóńilinen shyǵý úshin bar kúshimizdi salamyz. Qazir barlyq sát pysyqtalýda. Meni erekshe qýanyshqa bólegen jait - almatylyqtar men qala qonaqtarynyń keremet dostyq kóńili boldy. Al bul biz úshin mańyzdy jait dep aitýǵa bolady. 28 shildede ótetin «Aziia Daýysy» festivaliniń ashylý saltanaty keremet ótetinine senimdimin"
Festival bul joly ózgeristerge toly bolmaq. Máselen, biyl «Aziia daýysy» baiqaýy bolmaidy. Ázirge start-kontsert jasalýda. Bul - Aziia daýysynyń 2023 jylǵy basty mindeti. Festivaldiń birinshi kúninde tek qazaqstandyq ónerpazdar sahnaǵa shyǵady.
Al festivaldiń ekinshi kúni Black Eyed Peas toby kontsert beredi. Al «Aziia daýysynyń» úshinshi kúni aty ańyzǵa ainalǵan ánshiler men toptarǵa arnalady. Sebebi atalmysh kúni «Ialla», Iýldýz Ýsmanova, Secret Service óner kórsetedi. Biraq juldyzdar tizimi taǵy da tolyqpaq.
Dalanews.kz, DALA INSIDE, «Qala men Dala» gazeti - "Aziia daýysy" festivaliniń aqparattyq seriktesi. Jańalyqtarymyzdy baqylap otyryńyzdar!
