Qyrǵyzstannyń burynǵy prezidenti Almazbek Atambaevqa qatysty Qoi-Tashtaǵy oqiǵalar boiynsha ótip jatqan sotta taraptardyń jaryssózderi aiaqtaldy, dep habarlaidy Dalanews.kz.
Prokýrorlar birneshe saǵat boiy aiyptaý aktisin oqyp, Atambaevqa 11 jylǵa bas bostandyǵynan aiyrý jazasyn taǵaiyndaýdy surady. Dál osyndai jaza Qyrǵyzstan Ulttyq qaýipsizdik memlekettik komitetiniń (UQMK) Toǵyzynshy qyzmetiniń burynǵy qyzmetkeri Kanat Saǵymbaevqa da talap etildi.
Budan bólek, Ravshan Jeenbekov, Farida Niiazova jáne Farhat Baabievti 10 jylǵa sottaý usynylǵan.
Qorǵaýshy Aibek Týrdýevtiń aitýynsha, Asel Kodýronova, Irina Karamýshkina jáne Kýndýz Joldýbaevaǵa qatysty merzimi kórsetilmegen probatsiialyq baqylaý qoldaný usynylyp otyr.
Sot otyrysy erteń jalǵasady.
Qoi-Tash oqiǵasy: qysqasha sholý
2019 jylǵy 7 tamyzda Qyrǵyzstannyń arnaiy jasaǵy Almazbek Atambaevtyń Qoi-Tashtaǵy rezidentsiiasyn kúshtep alýǵa tyrysty. Kelesi kúni IIM men UQMK birlesip ekinshi arnaiy operatsiia ótkizip, eks-prezidentti ustap áketken.
Oqiǵa kezinde Atambaevtyń jaqtastary kúshtik qurylymdarǵa tas laqtyryp, qoqys pen avtodóńgelekterdi órttegen. Qaqtyǵys eki kúnge sozylyp, 136 adam jaralanyp, bir arnaiy jasaq qyzmetkeri oqtan qaza tapty.
Eks-prezidentke birqatar qylmystyq is boiynsha aiyp taǵylǵan:
2019 jylǵy Qoi-Tashtaǵy jappai tártipsizdikke qatysý
Jemqorlyq
Qylmystyq jolmen kelgen aqshany zańdastyrý
Sondai-aq oǵan:
Túrkiia azamattaryna zańsyz pasport berý
2020 jylǵy qazandaǵy jappai tártipsizdikti uiymdastyrý isteri boiynsha da aiyp taǵylǵan.
Alaida sońǵy eki is boiynsha Atambaev aqtalǵan.
Qoi-Tash oqiǵasyna qatysty materialdar jer telimderi men JEO-ǵa kómir jetkizý isterimen biriktirilgen.
