قىرعىزستاننىڭ بۇرىنعى پرەزيدەنتى المازبەك اتامبايەۆقا قاتىستى قوي-تاشتاعى وقيعالار بويىنشا ءوتىپ جاتقان سوتتا تاراپتاردىڭ جارىسسوزدەرى اياقتالدى، دەپ حابارلايدى Dalanews.kz.
پروكۋرورلار بىرنەشە ساعات بويى ايىپتاۋ اكتىسىن وقىپ، اتامبايەۆقا 11 جىلعا باس بوستاندىعىنان ايىرۋ جازاسىن تاعايىنداۋدى سۇرادى. ءدال وسىنداي جازا قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) توعىزىنشى قىزمەتىنىڭ بۇرىنعى قىزمەتكەرى كانات ساعىمبايەۆقا دا تالاپ ەتىلدى.
بۇدان بولەك، راۆشان جەەنبەكوۆ، فاريدا نيازوۆا جانە فارحات باابييەۆتى 10 جىلعا سوتتاۋ ۇسىنىلعان.
قورعاۋشى ايبەك تۋردۋيەۆتىڭ ايتۋىنشا، اسەل كودۋرونوۆا، يرينا كارامۋشكينا جانە كۋندۋز جولدۋبايەۆاعا قاتىستى مەرزىمى كورسەتىلمەگەن پروباسيالىق باقىلاۋ قولدانۋ ۇسىنىلىپ وتىر.
سوت وتىرىسى ەرتەڭ جالعاسادى.
قوي-تاش وقيعاسى: قىسقاشا شولۋ
2019 جىلعى 7 تامىزدا قىرعىزستاننىڭ ارنايى جاساعى المازبەك اتامبايەۆتىڭ قوي-تاشتاعى رەزيدەنسياسىن كۇشتەپ الۋعا تىرىستى. كەلەسى كۇنى ءىىم مەن ۇقمك بىرلەسىپ ەكىنشى ارنايى وپەراسيا وتكىزىپ، ەكس-پرەزيدەنتتى ۇستاپ اكەتكەن.
وقيعا كەزىندە اتامبايەۆتىڭ جاقتاستارى كۇشتىك قۇرىلىمدارعا تاس لاقتىرىپ، قوقىس پەن اۆتودوڭگەلەكتەردى ورتتەگەن. قاقتىعىس ەكى كۇنگە سوزىلىپ، 136 ادام جارالانىپ، ءبىر ارنايى جاساق قىزمەتكەرى وقتان قازا تاپتى.
ەكس-پرەزيدەنتكە ءبىرقاتار قىلمىستىق ءىس بويىنشا ايىپ تاعىلعان:
2019 جىلعى قوي-تاشتاعى جاپپاي تارتىپسىزدىككە قاتىسۋ
جەمقورلىق
قىلمىستىق جولمەن كەلگەن اقشانى زاڭداستىرۋ
سونداي-اق وعان:
تۇركيا ازاماتتارىنا زاڭسىز پاسپورت بەرۋ
2020 جىلعى قازانداعى جاپپاي تارتىپسىزدىكتى ۇيىمداستىرۋ ىستەرى بويىنشا دا ايىپ تاعىلعان.
الايدا سوڭعى ەكى ءىس بويىنشا اتامبايەۆ اقتالعان.
قوي-تاش وقيعاسىنا قاتىستى ماتەريالدار جەر تەلىمدەرى مەن جەو-عا كومىر جەتكىزۋ ىستەرىمەن بىرىكتىرىلگەن.
