Qazaqstan Respýblikasy Prezidenti Ákimshiliginiń Memlekettik quqyq bólimine, «QR Konstitýtsiiasyna ózgerister men tolyqtyrýlar engizý týraly» Qazaqstan Respýblikasy zańynyń jobasyna usynys
Elbasynyń Qazaqstan Respýblikasynyń Konstitýtsiiasyna ózgerister men tolyqtyrýlar engizý arqyly bilik tarmaqtary arasynda ókilettikterdi qaita bólý týraly bastamasyn tolyq qoldaimyn.
Táýelsizdiktiń tóbesi kórine bastaǵan sonaý bir eleń-alań usta Ult Kóshbasshysy batyl sheshim qabyldap, kóregendikpen jolǵa qoiǵan Kóshi-qon saiasaty da óz jemisin berip úlgirdi, 25 jylda millionnan asa qandasymyz atajurtyna oraldy.
Biraq, sol qazaq kóshiniń ótken 25 jylda basyp ótken joly oqtai túzý bola qoiǵan joq, Sharyqtaǵan tusy da, qurdymǵa kete jazdaǵan kezi de boldy. Sonyń bárinde Nursultan Ábishuly bas bolyp, kósh kerýenin jónge keltirip, baǵytyn aiqyndap otyrdy.
Mine, endi Uly Dala Eliniń tarxynda damýdyń úshinshi tóńkerisin jasaǵaly jatyrmyz. «Ata Zańǵa» ózgertýler men tolyqtyrýlar engizý týraly usynys, ishinara birer baby bolmasa, jurtshylyqtan tolyq qoldaý tabýda.
El qatary, aldaǵy zamandarda da Qazaq Eline oralǵysy keletin shette júrgen qandastaryńyzdyń joly máńgi ashyq bolsa eken degen izgi niet pen asyl arman ár qazaqtyń kókeinde bar ekenin aitqym keledi.
Mine, talqyǵa túsip jatqan «Ata Zańnyń» kelesi jańa nusqasynda sol másele óz sheshimin tabady degen senimdemin.
Óitkeni, «Kóshi-qon» – Ult Kóshbasshysy Nursultan Nazarbaevtyń TUŃǴYSh hám ULY saiasaty! Nursultan Ábishulynyń kemeńger tulǵa ekenin tórtkúl dúniege birden tanytqan da alysta júrgen aǵaiyndy Atajurtqa shaqyrý týraly shyǵarǵan osy batyl ári tárihi sheshimi ekeni moiyndalǵan shyndyq!
1991 jyly 18 qarashada «Aýyldyq jerlerde jumys isteýge tilek bildirýshi baiyrǵy ult adamdarynyń basqa respýblikalardan jáne shet elderden Qazaq KSR-yna kóship kelýi tártibi men sharttary týraly» atty N.Nazarbaev shyǵartqan osynaý aqjoltai qaýlydan soń jańa Qazaqstannyń tasy birden órge domalap sala berdi emes pe?!!
Aq túieniń qaryny jarylǵandai alqa-qotan bolyp qýanyp jatqan osy mereili tusta Sizderden, QR Konstitýtsiianyń 10-babyn «RESPÝBLIKA ShEGINEN TYS JERLERDE TURATYN ETNIKALYQ QAZAQTAR QAZAQSTAN RESPÝBLIKASYNA KEDERGIZSIZ ORALADY JÁNE TURÝ MERZIMINE QARAMASTAN, QAZAQSTAN RESPÝBLIKASYNYŃ AZAMATTYǴYN JEŃILDETILGEN TÁRTIPPEN (TIRKEÝ TÁRTIBIMEN) ALADY.» - degen bir jańa tarmaqpen tolyqtyrýdy suraimyn.
Qurmetpen Aýyt Muqibek, aqyn.
06.02.2017
Astana
