Onyń aitýynsha, partiia Tóraǵasy Qasym-Jomart Toqaevtyń Jańa Qazaqstandy qurý boiynsha alǵa qoiǵan mindetterin sapaly ári ýaqtyly oryndaý úshin barlyq partiialyq resýrstardy jumyldyrý qajet.
– Biz Memleket basshysy belgilegen reformalardy iske asyrý maqsatynda toptasýymyz qajet. Elimiz úshin osy kúrdeli kezeńde aýyzbirshilik tanytyp, Prezident jaqtastyrynyń negizi bola bilýimiz kerek dep sanaimyn. «Nur Otan» partiiasy – memlekettiligimizdiń institýtsionaldyq tiregi. Biz qoǵamdaǵy barlyq konstrýktivtik kúshterdiń toptasýyn qamtamasyz etip, bar resýrstardy jumyldyra otyryp, qoǵamdaǵy turaqtylyqtyqty saqtaýǵa úlken úles qosa alamyz. Eldiń damýy úshin eń mańyzdysy – saiasi turaqtylyq pen qoǵamdaǵy kelisim, – dedi Ashat Oralov.
Ol «Nur Otan», eń aldymen, qarapaiym múshelerdiń, iaǵni, muǵalimderdiń, meditsina qyzmetkerleriniń, ónerkásiptik kásiporyndar jumysshylarynyń jáne qarapaiym partiialastardyń múddelerin qorǵaýǵa tiis ekenin atap ótti. «Nur Otan» partiiasynyń basty maqsaty – halyqpen jumys júrgizý, problemalaryn bilý jáne olardy sheshý úshin jaǵdai jasaý, bilik pen halyqtyń arasynda konstrýktivtik qarym-qatynasty qamtamasyz etý.
– Búginde «Nur Otan»-ǵa úlken jaýapkershilik júktelip otyr. Sondyqtan biz óz jumysymyzdy qaita qaraýymyz kerek. Barlyq partiialyq organdardyń, partiialyq fraktsiianyń, qoǵamdyq keńesterdiń, bastaýysh partiia uiymdarynyń jumys tiimdiligin arttyrý qajet. Partiianyń bastamalary ortalyqta ǵana emes, barlyq jergilikti jerlerde kórinis tabýy úshin partiialyq qurylymdardyń búkil múmkindikterin jumyldyrǵan jón. Ásirese, bastaýysh partiia uiymdaryna basymdyq berý kerek. Bizdiń 4,5 myńnan astam bastaýysh partiialyq uiymymyz bar. Bul – kez kelgen saiasi partiianyń negizgi ózegi, onyń naqty kúshi. «Nur Otan»-ǵa degen senim dál osy bastaýysh uiymdardan bastaý alady. «Bastaýysh uiymdar» partiialyqtardyń pikir alysý, naqty problemalardy sheshý ornyna ainalýy tiis. Belsendi emes, tiimsiz basshylardyń ornyna ashyq jinalystarda naqty bedeli bar kóshbasshylar sailanýy tiis, – dedi «Nur Otan»-nyń Atqarýshy hatshysy.
Sonymen qatar, Ashat Oralov «Jas Otan» jastar qanatynyń aldyna birqatar naqty mindetter qoidy. Onyń aitýynsha, jastardy partiia ainalasyna biriktirý, naqty jumys isteitin «áleýmettik liftiler» qurý mańyzdy.
– Bul rette «Jas Otan»-ǵa erekshe mindet júkteledi. Ol formaldy is-sharalardan bas tartyp, jastardyń barlyq sanattarymen jumysty jańa formatta júrgizýi qajet. «Jas Otan» belsendi jastar men úkimettik emes uiymdardy jumyldyrý ortalyǵyna ainalýy tiis. Bul uiymdaspaǵan jáne aýyl jastaryna basa nazar aýdara otyryp, kún saiynǵy júieli atqarylatyn jumys bolýy tiis. Osy baǵyttaǵy jumystarǵa 500-den astam adamnan turatyn Jas depýtattar korpýsyn tartý qajet, – dep atap ótti Ashat Oralov.
Sondai-aq, ol filialdardaǵy jumysqa azamattyq ustanymy bar belsendi adamdar, eń aldymen Prezidenttik jastar kadrlyq rezerviniń, praimerizdiń, oblystardyń, qalalar men aýdandardyń rezervtik partiialyq tizimderiniń qatysýshylary tartylýy tiis ekenin atap ótti.
– Barlyq sailaý aldyndaǵy mindettemeler tolyq kólemde oryndalýy tiis. Partiia Tóraǵasy Qasym-Jomart Kemeluly Toqaev óz sózinde: «Partiianyń odan ári ómirsheńdigi sailaýaldy ýádelerdiń qanshalyqty oryndalatynyna bailanysty ekenin túsiný kerek» dedi. Árbir eldi meken boiynsha 2021 jylǵy óńirlik sailaýaldy baǵdarlamalardyń iske asyrylýyna taldaý jasap, oryndalý sapasyna erekshe nazar aýdara otyryp, nátijelerin barlyq deńgeidegi máslihattardaǵy fraktsiialar otyrystarynda qaraý kerek, – dep atap ótti Ashat Oralov.
Sonymen qatar, ol azamattardyń ózekti máselelerine ýaqtyly den qoiý, olardy tikelei efirde talqylaý tájiribesin engizý qajettigine nazar aýdardy.
Onyń pikirinshe, máslihattardaǵy partiia fraktsiialarynyń otyrystary azamattarmen kún tártibin aldyn ala talqylai otyryp, ashyq ótkizilýi tiis.
Atqarýshy hatshy taǵy bir mindet retinde máslihat depýtattarynyń sailaýshylarmen esep berý kezdesýlerin ótkizýdi tájiribege engizýdi jáne ózekti problemalar boiynsha, onyń ishinde shalǵai eldi mekenderde kóshpeli otyrystar uiymdastyrýdy atady.
– Kelesi aptadan bastap Májilis depýtattary halyqpen kezdesý úshin óńirlerge shyǵady. Eń aldymen, kezdesýlerdiń ashyqtyǵyna basa nazar aýdarǵan jón, formalizm bolmaýy qajet. Qabyldaýǵa halyq qalaýlylarymen kezdeskisi keletinderdiń barlyǵyn jazý kerek. Jalpy, partiianyń qoǵamdyq qabyldaý bólmeleriniń jumysyn kúsheitý qajet. Óńirler men Respýblikalyq qoǵamdyq qabyldaý bólmesi servistik model aiasynda azamattardan kelip túskennen bastap túpkilikti sheshim shyqqanǵa deiingi ótinishterge monitoring júrgizýi tiis, – dedi Ashat Oralov.
