ونىڭ ايتۋىنشا، پارتيا ءتوراعاسى قاسىم-جومارت توقايەۆتىڭ جاڭا قازاقستاندى قۇرۋ بويىنشا العا قويعان مىندەتتەرىن ساپالى ءارى ۋاقتىلى ورىنداۋ ءۇشىن بارلىق پارتيالىق رەسۋرستاردى جۇمىلدىرۋ قاجەت.
– ءبىز مەملەكەت باسشىسى بەلگىلەگەن رەفورمالاردى ىسكە اسىرۋ ماقساتىندا توپتاسۋىمىز قاجەت. ەلىمىز ءۇشىن وسى كۇردەلى كەزەڭدە اۋىزبىرشىلىك تانىتىپ، پرەزيدەنت جاقتاستىرىنىڭ نەگىزى بولا ءبىلۋىمىز كەرەك دەپ سانايمىن. «Nur Otan» پارتياسى – مەملەكەتتىلىگىمىزدىڭ ينستيتۋسيونالدىق تىرەگى. ءبىز قوعامداعى بارلىق كونسترۋكتيۆتىك كۇشتەردىڭ توپتاسۋىن قامتاماسىز ەتىپ، بار رەسۋرستاردى جۇمىلدىرا وتىرىپ، قوعامداعى تۇراقتىلىقتىقتى ساقتاۋعا ۇلكەن ۇلەس قوسا الامىز. ەلدىڭ دامۋى ءۇشىن ەڭ ماڭىزدىسى – ساياسي تۇراقتىلىق پەن قوعامداعى كەلىسىم، – دەدى اسحات ورالوۆ.
ول «Nur Otan»، ەڭ الدىمەن، قاراپايىم مۇشەلەردىڭ، ياعني، مۇعالىمدەردىڭ، مەديسينا قىزمەتكەرلەرىنىڭ، ونەركاسىپتىك كاسىپورىندار جۇمىسشىلارىنىڭ جانە قاراپايىم پارتيالاستاردىڭ مۇددەلەرىن قورعاۋعا ءتيىس ەكەنىن اتاپ ءوتتى. «Nur Otan» پارتياسىنىڭ باستى ماقساتى – حالىقپەن جۇمىس جۇرگىزۋ، پروبلەمالارىن ءبىلۋ جانە ولاردى شەشۋ ءۇشىن جاعداي جاساۋ، بيلىك پەن حالىقتىڭ اراسىندا كونسترۋكتيۆتىك قارىم-قاتىناستى قامتاماسىز ەتۋ.
– بۇگىندە «Nur Otan»-عا ۇلكەن جاۋاپكەرشىلىك جۇكتەلىپ وتىر. سوندىقتان ءبىز ءوز جۇمىسىمىزدى قايتا قاراۋىمىز كەرەك. بارلىق پارتيالىق ورگانداردىڭ، پارتيالىق فراكسيانىڭ، قوعامدىق كەڭەستەردىڭ، باستاۋىش پارتيا ۇيىمدارىنىڭ جۇمىس تيىمدىلىگىن ارتتىرۋ قاجەت. پارتيانىڭ باستامالارى ورتالىقتا عانا ەمەس، بارلىق جەرگىلىكتى جەرلەردە كورىنىس تابۋى ءۇشىن پارتيالىق قۇرىلىمداردىڭ بۇكىل مۇمكىندىكتەرىن جۇمىلدىرعان ءجون. اسىرەسە، باستاۋىش پارتيا ۇيىمدارىنا باسىمدىق بەرۋ كەرەك. ءبىزدىڭ 4،5 مىڭنان استام باستاۋىش پارتيالىق ۇيىمىمىز بار. بۇل – كەز كەلگەن ساياسي پارتيانىڭ نەگىزگى وزەگى، ونىڭ ناقتى كۇشى. «Nur Otan»-عا دەگەن سەنىم ءدال وسى باستاۋىش ۇيىمداردان باستاۋ الادى. «باستاۋىش ۇيىمدار» پارتيالىقتاردىڭ پىكىر الىسۋ، ناقتى پروبلەمالاردى شەشۋ ورنىنا اينالۋى ءتيىس. بەلسەندى ەمەس، ءتيىمسىز باسشىلاردىڭ ورنىنا اشىق جينالىستاردا ناقتى بەدەلى بار كوشباسشىلار سايلانۋى ءتيىس، – دەدى «Nur Otan»-نىڭ اتقارۋشى حاتشىسى.
سونىمەن قاتار، اسحات ورالوۆ «Jas Otan» جاستار قاناتىنىڭ الدىنا ءبىرقاتار ناقتى مىندەتتەر قويدى. ونىڭ ايتۋىنشا، جاستاردى پارتيا اينالاسىنا بىرىكتىرۋ، ناقتى جۇمىس ىستەيتىن «الەۋمەتتىك ليفتىلەر» قۇرۋ ماڭىزدى.
– بۇل رەتتە «Jas Otan»-عا ەرەكشە مىندەت جۇكتەلەدى. ول فورمالدى ءىس-شارالاردان باس تارتىپ، جاستاردىڭ بارلىق ساناتتارىمەن جۇمىستى جاڭا فورماتتا جۇرگىزۋى قاجەت. «Jas Otan» بەلسەندى جاستار مەن ۇكىمەتتىك ەمەس ۇيىمداردى جۇمىلدىرۋ ورتالىعىنا اينالۋى ءتيىس. بۇل ۇيىمداسپاعان جانە اۋىل جاستارىنا باسا نازار اۋدارا وتىرىپ، كۇن سايىنعى جۇيەلى اتقارىلاتىن جۇمىس بولۋى ءتيىس. وسى باعىتتاعى جۇمىستارعا 500-دەن استام ادامنان تۇراتىن جاس دەپۋتاتتار كورپۋسىن تارتۋ قاجەت، – دەپ اتاپ ءوتتى اسحات ورالوۆ.
سونداي-اق، ول فيليالدارداعى جۇمىسقا ازاماتتىق ۇستانىمى بار بەلسەندى ادامدار، ەڭ الدىمەن پرەزيدەنتتىك جاستار كادرلىق رەزەرۆىنىڭ، پرايمەريزدىڭ، وبلىستاردىڭ، قالالار مەن اۋدانداردىڭ رەزەرۆتىك پارتيالىق تىزىمدەرىنىڭ قاتىسۋشىلارى تارتىلۋى ءتيىس ەكەنىن اتاپ ءوتتى.
– بارلىق سايلاۋ الدىنداعى مىندەتتەمەلەر تولىق كولەمدە ورىندالۋى ءتيىس. پارتيا ءتوراعاسى قاسىم-جومارت كەمەل ۇلى توقايەۆ ءوز سوزىندە: «پارتيانىڭ ودان ءارى ومىرشەڭدىگى سايلاۋالدى ۋادەلەردىڭ قانشالىقتى ورىندالاتىنىنا بايلانىستى ەكەنىن ءتۇسىنۋ كەرەك» دەدى. ءاربىر ەلدى مەكەن بويىنشا 2021 جىلعى وڭىرلىك سايلاۋالدى باعدارلامالاردىڭ ىسكە اسىرىلۋىنا تالداۋ جاساپ، ورىندالۋ ساپاسىنا ەرەكشە نازار اۋدارا وتىرىپ، ناتيجەلەرىن بارلىق دەڭگەيدەگى ءماسليحاتتارداعى فراكسيالار وتىرىستارىندا قاراۋ كەرەك، – دەپ اتاپ ءوتتى اسحات ورالوۆ.
سونىمەن قاتار، ول ازاماتتاردىڭ وزەكتى ماسەلەلەرىنە ۋاقتىلى دەن قويۋ، ولاردى تىكەلەي ەفيردە تالقىلاۋ تاجىريبەسىن ەنگىزۋ قاجەتتىگىنە نازار اۋداردى.
ونىڭ پىكىرىنشە، ءماسليحاتتارداعى پارتيا فراكسيالارىنىڭ وتىرىستارى ازاماتتارمەن كۇن ءتارتىبىن الدىن الا تالقىلاي وتىرىپ، اشىق وتكىزىلۋى ءتيىس.
اتقارۋشى حاتشى تاعى ءبىر مىندەت رەتىندە ءماسليحات دەپۋتاتتارىنىڭ سايلاۋشىلارمەن ەسەپ بەرۋ كەزدەسۋلەرىن وتكىزۋدى تاجىريبەگە ەنگىزۋدى جانە وزەكتى پروبلەمالار بويىنشا، ونىڭ ىشىندە شالعاي ەلدى مەكەندەردە كوشپەلى وتىرىستار ۇيىمداستىرۋدى اتادى.
– كەلەسى اپتادان باستاپ ءماجىلىس دەپۋتاتتارى حالىقپەن كەزدەسۋ ءۇشىن وڭىرلەرگە شىعادى. ەڭ الدىمەن، كەزدەسۋلەردىڭ اشىقتىعىنا باسا نازار اۋدارعان ءجون، فورماليزم بولماۋى قاجەت. قابىلداۋعا حالىق قالاۋلىلارىمەن كەزدەسكىسى كەلەتىندەردىڭ بارلىعىن جازۋ كەرەك. جالپى، پارتيانىڭ قوعامدىق قابىلداۋ بولمەلەرىنىڭ جۇمىسىن كۇشەيتۋ قاجەت. وڭىرلەر مەن رەسپۋبليكالىق قوعامدىق قابىلداۋ بولمەسى سەرۆيستىك مودەل اياسىندا ازاماتتاردان كەلىپ تۇسكەننەن باستاپ تۇپكىلىكتى شەشىم شىققانعا دەيىنگى وتىنىشتەرگە مونيتورينگ جۇرگىزۋى ءتيىس، – دەدى اسحات ورالوۆ.