Astanada «Energetikalyq jáne kommýnaldyq sektorlardy jańǵyrtý» jónindegi ulttyq joba aiasynda jylý jáne elektr jelileri nysandaryn jańartý boiynsha birden birneshe jobany iske asyrý bastaldy. Bul jumystardyń jalpy quny 4,5 mlrd teńgeden asady, dep habarlaidy dalanews.kz.
Jumystar kommýnaldyq qyzmetterdiń sapasyn arttyrýǵa jáne elordanyń infraqurylymdyq daiyndyǵyn qamtamasyz etýge baǵyttalǵan.
«Astana-Teplotranzit» AQ jalpy quny 870 mln teńge bolatyn eki jobany iske asyrýda. Jylytý maýsymy bastalǵanǵa deiin Q.Muhamedhanov kóshesiniń boiyndaǵy uzyndyǵy 492 metr bolatyn diametri 400 mm jylý trassasynyń qurylysyn aiaqtaý josparlanǵan. Nysan qalanyń qarqyndy boi kóterip kele jatqan aýdanynda ornalasqan, onda injenerlik jelilerge júktemeniń ósýi baiqalady. Jylý magistraliniń iske qosylýy jańa kvartaldardyń turǵyndaryn jylýmen turaqty qamtamasyz etedi.
Ekinshi nysanda uzyndyǵy 347 metr bolatyn JM-12 jylý trassasynyń bóligi jóndelip jatyr. Bul jańartý jumystary jelilerdiń tozýyn azaityp, qysta aiaz kúsheigen kezde qalany jylýmen turaqty qamtamasyz etýge múmkindik beredi. Osy eki jobaǵa salynatyn investitsiianyń jalpy kólemi 870 million teńgeden asady.
Al «Astana-ÓEK» aktsionerlik qoǵamy arqyly elektr taratý jelilerin kezeń-kezeńimen jańartý jumystary júrip jatyr. Jobanyń birinshi kezeńinde 1,4 milliard teńgege 7,08 shaqyrym jelini jańartý josparlanǵan. Buǵan qosa, tórtinshi kezeń aiasynda quny 200 million teńge bolatyn taǵy 9,59 shaqyrym elektr jelisi jóndeledi.
Sýmen jabdyqtaý salasy boiynsha «Astana sý arnasy» MKK Dosmuhameduly kóshesiniń boiymen, Aqjol kóshesinen Alash dańǵylyna deiingi aralyqta tehnikalyq sý qubyryn jóndeýge kiristi. Quny 2,47 milliard teńge bolatyn bul joba aiasynda 3 shaqyrymnan astam sý jelisi jańartylady. Jumystar tolyq aiaqtalǵannan keiin elordanyń osy aýdanyndaǵy negizgi infraqurylymnyń jaǵdaiy jaqsarady.
Bul jobalardy iske asyrý Astananyń kommýnaldyq júielerin turaqtandyrýǵa, apattardyń aldyn alýǵa jáne qala turǵyndaryna kórsetiletin qyzmet sapasyn arttyrýǵa baǵyttalǵan.
Eske salaiyq, «Energetikalyq jáne kommýnaldyq sektorlardy jańǵyrtý» ulttyq jobasy respýblika boiynsha 2029 jylǵa deiin iske asyrylady. Joba kommýnaldyq infraqurylymnyń tozýyn 40%-ǵa deiin tómendetýge jáne apat qaýpin 20% qysqartýǵa baǵyttalǵan. Ulttyq jobany iske asyrý nátijesinde kommýnaldyq qyzmetterdiń sapasy men turaqtylyǵyn arttyrý, taza sý jáne ekologiiany jaqsartý josparlanǵan.
