Astana qalasyndaǵy №113 jalpy orta «Keleshek» mektebinde innovatsiialyq biometriialyq júie iske qosyldy, dep habarlaidy Dalanews.kz
«Alaqan» júiesi mektepke kirý, shyǵý jáne ashanaǵa kirýdi baqylaýdyń jańa tásili retinde quryldy. Bul júie oqýshylardyń alaqandaryn skanerleý arqyly jumys isteidi. Ár oqýshynyń alaqan sipaty arnaiy tsifrlyq júiege tirkeledi, jáne olar mektepke kirip-shyǵý kezinde nemese ashanaǵa kirgende, tek alaqandary arqyly ǵana tirkelip ótedi. Bul ádis oqýshylardyń qaýipsizdigin arttyryp, mektep aýmaǵynda tártipti saqtaý úshin mańyzdy qadam bolyp sanalady.
«Bul júieniń artyqshylyǵy – balalardyń jeke tulǵasyn saqtaý. Oqýshylardyń bet beinesi túsirilmeidi, tek alaqany arqyly ǵana mektepke kirip-shyǵa alady. Bul ádis balalardyń qaýipsizdigin qamtamasyz etýge múmkindik beredi jáne bizge tehnologiianyń zamanaýi talaptaryna sai jumys isteýge jol ashady», – deidi mektep direktory Saýle Qaiyrbekqyzy.
Aita keteiik, bul júie oqýshylardyń mektepke kirý ýaqytyn naqty tirkep, olardyń qaýipsizdigin qadaǵalaýǵa múmkindik beredi.
Ata-analar júie arqyly qashyqtan oqýshylardyń mektepke kirip-shyǵýyn baqylai alady. Olarǵa oqýshylardyń qansha ýaqytta mektepten shyqqany týraly aqparat usynylady, bul ata-analardyń balalaryn baqylap otyrýyna múmkindik beredi.
