Biyl naýryz aiynan bastap elordadaǵy Esil aýdanynda aýlalar men qoǵamdyq keńistikterdi abattandyrý jumysy bastaldy, – dep habarlaidy Dalanews.kz
2024 jyly Esil aýdanynda 9 aýla jańartyldy. Atalǵan aýlalarda ashyq aspan astyndaǵy jattyǵý qurylǵylary, jańa oiyn keshenderi, vorkaýt-aimaqtar ornatyldy. Taǵy 49 aýlada jóndeý júrgizildi.
2025 jyly «Halyq qatysatyn biýdjet» jobasy aiasynda alty aýla abattandyrylady.
«Jobalardy iske asyrý barysynda turǵyndardyń usynystary eskeriledi. Bul protseste «Halyq qatysatyn biýdjet» baǵdarlamasynyń róli erekshe», – dedi Esil aýdanynyń ákimi Darmeniiar Qydyrbekuly.
Qalalyq keńistikterdi abattandyrýǵa da erekshe kóńil bólinip otyr. Ótken jyly aýqymdy jumys Botanikalyq baqta júrgizildi: kópirler qaita syrlandy, velojoldar, oryndyqtar men qoqys jáshikteri jańartyldy, jaryqtandyrý qalpyna keltirildi, vorkaýt-aimaqtar men balalar alańdary ornatyldy.
«Biyl naýryz aiynan bastap elordanyń negizgi oryndaryn keshendi jańartý bastaldy – Jelilik saiabaqtan Esil ózeniniń jaǵalaýyna deiin. Jumys Ál-Farabi meshiti janyndaǵy skverdi, EKSPO aýmaǵyn, «Astana Balet» teatry aldyndaǵy alańdy qamtydy. Abattandyrý – bul tek aýdan kelbetin ózgertý emes, árbir turǵynnyń jailylyǵy men ál-aýqatyna qosylǵan úles», – dep esepteidi Darmeniiar Qydyrbekuly.
Sondai-aq, Dostyq, Saýran jáne Qazaq radiosy kóshelerin jańartý jumysy júrip jatyr. Onda túrli-tústi tas tóselip, jaiaý júrginshilerge arnalǵan aimaqtar abattandyrylýda.
Aýdandy kógaldandyrý jumystary da qarqyndy júrgizilýde. Ótken jyly 13 myńnan astam aǵash pen 76 myńnan astam buta men kópjyldyq ósimdikter otyrǵyzyldy.
2025 jyly josparly baǵdarlama aiasynda aýdanǵa 16 myńnan astam aǵash jáne 68 myńnan astam buta men kópjyldyq ósimdikter otyrǵyzý josparlanǵan.
Aita keteiik, biyl Astanada 180-nen astam aýla men qoǵamdyq keńistik (saiabaqtar, gúlzarlar, jelekjoldar) abattandyrylady. Jumys qalanyń barlyq aýdanynda júrgiziledi. Abattandyrý kezinde kógaldandyrýǵa erekshe kóńil bólinedi.
Sondai-aq, biyl 1 millionnan astam jasyl jelek (aǵashtar, kóshetter, butalar jáne t.b.) otyrǵyzylady.
