بيىل ناۋرىز ايىنان باستاپ ەلورداداعى ەسىل اۋدانىندا اۋلالار مەن قوعامدىق كەڭىستىكتەردى اباتتاندىرۋ جۇمىسى باستالدى، – دەپ حابارلايدى Dalanews.kz
2024 جىلى ەسىل اۋدانىندا 9 اۋلا جاڭارتىلدى. اتالعان اۋلالاردا اشىق اسپان استىنداعى جاتتىعۋ قۇرىلعىلارى، جاڭا ويىن كەشەندەرى، ۆوركاۋت-ايماقتار ورناتىلدى. تاعى 49 اۋلادا جوندەۋ جۇرگىزىلدى.
2025 جىلى «حالىق قاتىساتىن بيۋدجەت» جوباسى اياسىندا التى اۋلا اباتتاندىرىلادى.
«جوبالاردى ىسكە اسىرۋ بارىسىندا تۇرعىنداردىڭ ۇسىنىستارى ەسكەرىلەدى. بۇل پروسەستە «حالىق قاتىساتىن بيۋدجەت» باعدارلاماسىنىڭ ءرولى ەرەكشە»، – دەدى ەسىل اۋدانىنىڭ اكىمى دارمەنيار قىدىربەك ۇلى.
قالالىق كەڭىستىكتەردى اباتتاندىرۋعا دا ەرەكشە كوڭىل ءبولىنىپ وتىر. وتكەن جىلى اۋقىمدى جۇمىس بوتانيكالىق باقتا جۇرگىزىلدى: كوپىرلەر قايتا سىرلاندى، ۆەلوجولدار، ورىندىقتار مەن قوقىس جاشىكتەرى جاڭارتىلدى، جارىقتاندىرۋ قالپىنا كەلتىرىلدى، ۆوركاۋت-ايماقتار مەن بالالار الاڭدارى ورناتىلدى.
«بيىل ناۋرىز ايىنان باستاپ ەلوردانىڭ نەگىزگى ورىندارىن كەشەندى جاڭارتۋ باستالدى – جەلىلىك ساياباقتان ەسىل وزەنىنىڭ جاعالاۋىنا دەيىن. جۇمىس ءال-فارابي مەشىتى جانىنداعى سكۆەردى، ەكسپو اۋماعىن، «استانا بالەت» تەاترى الدىنداعى الاڭدى قامتىدى. اباتتاندىرۋ – بۇل تەك اۋدان كەلبەتىن وزگەرتۋ ەمەس، ءاربىر تۇرعىننىڭ جايلىلىعى مەن ءال-اۋقاتىنا قوسىلعان ۇلەس»، – دەپ ەسەپتەيدى دارمەنيار قىدىربەك ۇلى.
سونداي-اق، دوستىق، ساۋران جانە قازاق راديوسى كوشەلەرىن جاڭارتۋ جۇمىسى ءجۇرىپ جاتىر. وندا ءتۇرلى-تۇستى تاس توسەلىپ، جاياۋ جۇرگىنشىلەرگە ارنالعان ايماقتار اباتتاندىرىلۋدا.
اۋداندى كوگالداندىرۋ جۇمىستارى دا قارقىندى جۇرگىزىلۋدە. وتكەن جىلى 13 مىڭنان استام اعاش پەن 76 مىڭنان استام بۇتا مەن كوپجىلدىق وسىمدىكتەر وتىرعىزىلدى.
2025 جىلى جوسپارلى باعدارلاما اياسىندا اۋدانعا 16 مىڭنان استام اعاش جانە 68 مىڭنان استام بۇتا مەن كوپجىلدىق وسىمدىكتەر وتىرعىزۋ جوسپارلانعان.
ايتا كەتەيىك، بيىل استانادا 180-نەن استام اۋلا مەن قوعامدىق كەڭىستىك (ساياباقتار، گۇلزارلار، جەلەكجولدار) اباتتاندىرىلادى. جۇمىس قالانىڭ بارلىق اۋدانىندا جۇرگىزىلەدى. اباتتاندىرۋ كەزىندە كوگالداندىرۋعا ەرەكشە كوڭىل بولىنەدى.
سونداي-اق، بيىل 1 ميلليوننان استام جاسىل جەلەك (اعاشتار، كوشەتتەر، بۇتالار جانە ت.ب.) وتىرعىزىلادى.
