Astanada Raqymjan Qoshqarbaev dańǵyly, 60 mekenjaiynda «Halyq qatysatyn biýdjet» jobasy aiasynda abattandyrylǵan aýla aýmaǵynyń ashylý rásimi ótti, dep habarlaidy dalanews.kz.
Joba sheńberinde aýladaǵy barlyq shaǵyn sáýlet nysandary jańartylyp, zamanaýi oiyn jáne sport alańdary ornatyldy. Sondai-aq 340 sharshy metr aýmaqqa jasandy kógal tóselip, shamamen 550 sharshy metr tartan jabyndysy salyndy.
Turǵyndardyń belsendi ómir saltyn ustanýyna múmkindik jasaý maqsatynda trenajer jáne vorkaýt alańdary jabdyqtaldy. Demalys aimaqtaryna oryndyqtar men besedkalar qoiyldy. Balalar úshin animatorlardyń qatysýymen arnaiy oiyn-saýyq baǵdarlamasy uiymdastyryldy.
Ashylý saltanatyna turǵyndar, aýdan ákimdigi ókilderi men merdiger uiym qyzmetkerleri qatysty. Is-sharaǵa júzge jýyq adam jinaldy.
Turǵyndardyń biri jańa aýla úshin rizashylyǵyn bildirip, mundai bastamalardyń qala turǵyndary úshin mańyzdy ekenin atap ótti.
«Aýlamyzdyń osyndai zamanaýi ári jaily bolǵanyna óte qýanyshtymyz. Bul balalarymyzdyń qaýipsiz oinap, eresekterdiń sportpen ainalysýyna jaqsy múmkindik. Osy jumystardy uiymdastyrǵan ákimdikke alǵys aitamyz. Endi turǵyndar da ortaq múlikke jaýapkershilikpen qarap, tazalyq pen tártipti saqtaýy kerek. Sonda ǵana mundai igiliktiń paidasyn uzaq ýaqyt kóremiz», – dedi turǵyn.
Joba turǵyndardyń usynystary negizinde júzege asyrylyp, aýla keńistigin qaýipsiz ári qolaily etýge baǵyttaldy. Mamandardyń aitýynsha, mundai bastamalar qaladaǵy qoǵamdyq keńistikterdiń sapasyn arttyryp, turǵyndardyń ómir súrý jailylyǵyn jaqsartýǵa múmkindik beredi.
