Astana qalasynda Nura aýdanynyń tótenshe jaǵdaılar basqarmasynyń qyzmetkerleri jataqhanalar men hostelderde órt qaýipsizdigi qaǵıdalarynyń saqtalýyn tekserý maqsatynda profılaktıkalyq reıd ótkizdi,- dep habarlaıdy Dalanews.kz
«Bul reıdti Nura aýdanynyń ákimdigimen birlesip ótkizip jatyrmyz. Aýdanymyzdyń aýmaǵynda barlyǵy bes hostel bar, olardyń árqaısysyna bardyq. Hostel ıeleri men turǵyndaryna órt qaýipsizdigi talaptary boıynsha túsindirý júrgizildi, zańbuzýshylyqtardy joıýǵa qatysty usynymdar berildi, aqparattyq jadynamalar tabystaldy», – dedi Nura aýdany tótenshe jaǵdaılar basqarmasynyń ınspektory, aǵa leıtenant Aıdos Baltabaı.
TJD mamandary hostelder men jataqhanalardaǵy órt qaýipsizdiginiń negizgi qaǵıdalaryn eske saldy:
- órt kezinde dabyl berý júıesi árdaıym jumys istep turýy tıis;
- evakýasıalyq shyǵý joldaryn bógemeý qajet;
- órt sóndirý quraldarynyń jetkilikti mólsheri bolýy tıis;
- adamdardy jertóle bóliginde turǵyzýǵa bolmaıdy;
- bólmeler men qabattarda shylym shegýge tyıym salynady;
- elektr quraldaryn paıdalanǵanda qaýipsizdik sharalaryn saqtaý qajet;
- tez tutanǵysh jáne jarylys qaýpi bar materıaldardy paıdalanýǵa jáne olardy bólmeler men ortaq paıdalaný oryndarynda saqtaýǵa bolmaıdy;
- personal men turǵyndar órt kezindegi áreket etý erejelerine úıretilýi kerek, al turǵyndar evakýasıa jospary boıynsha aqparattandyrylýy.
