Astana qalasynyń Tótenshe jaǵdailar departamenti jylytý maýsymynyń bastalýyna bailanysty Nura aýdanyndaǵy Úrker shaǵyn aýdanynda túsindirý is-sharasyn ótkizdi, dep habarlaidy dalanews.kz.
«Zań men tártip» tujyrymdamasy aiasynda elordada turǵyndardyń qaýipsizdigin qamtamasyz etý jáne turmystyq órtterdiń aldyn alý baǵytyndaǵy profilaktikalyq jumystar júrgizilip jatyr.
Is-shara barysynda qutqarýshylar turǵyndarǵa órt qaýipsizdigi talaptaryn túsindirip, úilerge ýly gaz ben tútindi anyqtaityn datchikter ornatty. Sonymen qatar mamandar pesh murjalaryn tazalaý jumystaryn júrgizdi.
Nura aýdanyndaǵy Tótenshe jaǵdailar basqarmasynyń injeneri Nurmahanbet Diastyń aitýynsha, jyl basynan beri Úrker shaǵyn aýdanynda 100-den astam kómirtegi totyǵy men tútin datchigi ornatylǵan.
Mamandar turǵyndardy jylytý quraldaryn durys paidalanýǵa, murjalardy ýaqytyly tazalaýǵa jáne órt qaýipsizdigi erejelerin qatań saqtaýǵa shaqyrady.
Mundai profilaktikalyq sharalar órt pen kómirtegi totyǵynan ýlaný qaýpin azaityp, turǵyndardyń ómiri men densaýlyǵyn qorǵaýǵa baǵyttalǵan.
