Astanada Qyran turǵyn úi keshenindegi jyljymaityn múlikti satý kezinde jasalǵan alaiaqtyq isi boiynsha sot úkimi shyqty, dep habarlaidy dalanews.kz.
Sot International Invest Company IIC JShS-nyń tórt qyzmetkerin kináli dep tanyp, olardy 8 jyldan 9 jylǵa deiin bas bostandyǵynan aiyrý jazasyna kesti.
Qarjylyq monitoring agenttiginiń Astana qalasy boiynsha departamenti tergeý barysynda sottalǵandar satyp alý-satý sharttaryn jasasýdyń ornyna memlekettik tirkeýge jatpaityn ári satyp alýshylarǵa menshik quqyǵyn bermeitin brondaý sharttaryn, kepilaqy týraly kelisimder men aldyn ala sharttardy rásimdegenin anyqtaǵan.
Satý keńsesinde JShS atynan áleýetti satyp alýshylarǵa nysandardyń maketteri, tehnikalyq pasporttar, senimhattar, kompaniianyń jyljymaityn múlik nysandaryna menshik quqyǵy bar degendi rastaityndai anyqtamalar kórsetilgen.
Azamattarǵa páterlerdi, turǵyn emes úi-jailardy jáne avtoturaq oryndaryn naryqtaǵy baǵadan tómen baǵaǵa satyp alý usynylǵan. Olar mámileler zańdy ekenine sendirgen.
Jábirlenýshiler qarajatty qolma-qol da, alaiaqtyqqa qatysýshylardyń jeke shottaryna aýdarý arqyly da bergen. Bul operatsiialar International Invest Company IIC JShS-nyń býhgalterlik jáne bank qujattarynda kórsetilmegen.
Sottalǵandar qurylys salýshy kompaniianyń óz qarajatyn jymqyrýǵa baǵyttalǵan ekinshi alaiaqtyqty da iske asyrǵan. Olar International Invest Company IIC JShS atynan klienttermen jalǵan satyp alý-satý sharttaryn jasap, jyljymaityn múlik nysandaryna menshik quqyǵyn tirkegen. Alaida satýdan túsken aqsha kompaniia kassasyna túspegen.
Sot 35 jábirlenýshiniń jalpy somasy 2,2 mlrd teńgeden asatyn talap aryzyn qanaǵattandyrdy. Sondai-aq, sot International Invest Company JShS paidasyna 3,9 mlrd teńge óndirip alý týraly sheshim shyǵardy.
Jábirlenýshilerge jalpy quny 1,3 mlrd teńge bolatyn 78 jyljymaityn múlik nysany berildi. Taǵy 73 nysan adal nietti satyp alýshylarǵa berildi.
Úkim zańdy kúshine engen joq.
