Astanadaǵy Dostyq úiinde «Qosh keldiń, áz Naýryz» atty merekelik is-shara ótip, oǵan diplomatiialyq ókildikterdiń elshileri, Qazaqstan halqy Assambleiasynyń, memlekettik organdardyń, qoǵamdyq uiymdardyń ókilderi, elordalyq QHA músheleri, qoǵam qairatkerleri, qala turǵyndary men qonaqtary qatysty, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
– Qurmetti, halaiyq. Áz-Naýryz merekesi qutty bolsyn! Elimiz aman, jurtymyz tynysh bolsyn! Ózderińiz biletindei, qystyń ornyn shýaqty kóktem basyp, tirshilik qaita túleidi. Qazirgi ýaqytta dástúrge sai ózderińizben Dostyq úiinde bas qosýymyz jalǵasýda. Bul Naýryz merekesi sonaý tarihy tereń ata-babamyzdan kele jatqan, búginde ult pen ulystyń basyn qosyp, elimizdiń myzǵymas birliginiń aiqyny. Búginde beibitshilik pen kelisimniń naǵyz kórsetkishi dep aitýǵa bolady. Barlyqtaryńyzǵa denderińizge saýlyq, otbasylaryńyzǵa amandyq tileimin, – dedi Astana qalasy Ishki saiasat basqarmasynyń basshysy Nurdáýlet Álmuqanov.
Is-shara barysynda qonaqtardyń nazaryna kontserttik jáne oiyn-saýyq baǵdarlamasy usynyldy. Alańda kiiz úiler men altybaqan ornatylyp, qazandarda naýryz kóje daiyndaldy. Teatrlandyrylǵan qoiylymdar, qazaqtyń salt-dástúrine arnalǵan kórinister kórsetildi.
Ár etnobirlestik mádenietin tanystyryp, erekshe ónerlerin ortaǵa saldy. Sondai-aq qol kúres, qazaqsha kúres, asyq atý, gir kóterý siiaqty sport túrleri boiynsha jarystar uiymdastyryldy. Sporttyq oiyndardyń jeńimpazdary alǵyshattarmen jáne baǵaly syilyqtarmen marapattaldy.
– Naýryz – kóktemniń, jańarýdyń, beibitshilik pen birliktiń merekesi. Búgingi Dostyq úiindegi Ulystyń uly kúnine arnalǵan merekelik is-shara kópultty Qazaqstan halqynyń birligin nyǵaitýǵa, salt-dástúrlerdi jańǵyrtýǵa, ulttyq mádenietimizdi dáripteýge baǵyttalǵan. Áz-Naýryz merekesi qutty bolsyn, – dedi Astana qalasy QHA hatshylyǵynyń bas mamany Janna Ábdýáli.
