Sońǵy jeti aida elordalyq №2 kópsalaly balalar aýrýhanasynda 500 myń teńgeden asatyn ondaǵan kúrdeli operatsiia tegin jasaldy. Mundai joǵary tehnologiialyq meditsinalyq kómek turǵyndarǵa mindetti áleýmettik meditsinalyq saqtandyrý aiasynda qoljetimdi bolyp otyr,- dep habarlaidy Dalanews.kz
Kópsalaly qalalyq №2 balalar aýrýhanasynda otorinolaringologiia, neirohirýrgiia jáne ortopediia salasyndaǵy kúrdeli ári joǵary tehnologiialyq operatsiialardyń tolyq spektri jasalady.
Joǵary tehnologiialyq ota jasaýǵa kópsalaly dárigerler tobynyń qatysýy, zamanaýi jabdyqtar men implanttardy qoldaný jáne innovatsiialyq emdeý tásilderi qajet. Mundai aralasýlardyń quny milliondaǵan teńgege jetkenimen, balalar úshin olar tolyqtai tegin júrgiziledi.
Aýrýhanada balalarǵa estý qabiletin qaitaratyn kohlearlyq implantatsiia jasalady.
2024 jyly statsionar jaǵdaiynda 827 mln teńgege 108 operatsiia jasalǵan. Sońǵy 7 aida 536 mln teńgeden asatyn 68 operatsiia ótti.
"Neirohirýrgiia salasynda da kúrdeli otalar jasalady. Bas súiek jaraqattary, isik nemese týa bitken patologiia kezinde arnaiy plastinalar qoldanylady. Bul ota dárigerden zergerlik dáldikti, erekshe tájiribeni jáne qymbat jabdyqty talap etedi. Mundai aralasýlar balalardyń ómirin saqtap, aýyr múgedektiktiń aldyn alady. Sondai-aq, mamandar neironavigatsiia men neiromonitoring arqyly mi isikterine ota jasaidy", - delingen habarlamada.
2024 jyly 68 mln teńgege 39 ota jasalǵan. Biylǵy jeti aida 38 mln teńgege 21 ota ótti.
2024 jyldyń sońynda aýrýhanada jańa qyzmet túri – jambas-san býynyn endoprotezdeý engizildi. Dárigerler alǵashqy otalardy 4,6 mln teńgege jasady.
«Búgingi kúnge deiin biz jambas-san býynyn aýystyrý boiynsha 7 operatsiia jasadyq. Bul protezderdi arnaiy qor satyp áperdi. Al emdeýdiń ózi áleýmettik meditsinalyq saqtandyrý qory esebinen júrgizildi. Balalar ortopediiasynda birneshe baǵyt bar, eń qymbaty – onkoprotezdeý, ol densaýlyq saqtaý ministrligi tarapynan qamtamasyz etiledi. Budan bólek, biz mikrohirýrgiialyq otalar jasaimyz, onyń quny shamamen 800 myń teńge. Jyl sońyna deiin taǵy úsh jambas-san býynyn aýystyrý operatsiiasyn jasaý josparlanýda, – dedi ortopediia bóliminiń meńgerýshisi Aǵabek Shyqynaev.
