Astanada qaldyqtardy qaıta óńdeý damyp, jetilip keledi. Elordalyq kásiporyndar plasıkany paıdaly ónimge aınaldyrady, al mektepterde oqýshylar qaldyqtardy bólek jınaýdy úırenip júr, - dep habarlaıdy Dalanews.kz elorda ákimdiginiń resmı saıtyna silteme jasap.

Qazirgi ýaqytta qaldyqsyz óndiris qaǵıdatyna súıene otyryp, qaıta óńdelgen plasıkadan kóptegen ónim jasap shyǵarylady: oryndyqtar, qoqys jáshikteri, balalar alańynyń jabdyqtary, gúl qumyralary jáne basqa da turmystyq zattar.

Astanada qaldyqtardy qaıta óńdeıtin negizgi zaýyttan bólek, plasıkti qaıta óńdeýmen aınalysatyn shaǵyn kásiporyndar paıda bolýda.

Osy kompanıalardyń biri qalalyq jáne jeke aýmaqtardy kógaldandyrý úshin qoldanylatyn zattardy, sondaı-aq saıabaq jıhazdary men shaǵyn arhıtektýralyq pishinderdi shyǵarýǵa mamandanǵan. 2020-2024 jyldary kompanıa 400 tonnaǵa jýyq plasık qaldyqtaryn qaıta óńdedi, onyń óndiristik qýaty jylyna 5000-nan astam ónimdi quraıdy.

Bul bastama qorshaǵan ortaǵa túsetin aýyrlyqty azaıtyp, qalalyq ınfraqurylymnyń damýyna yqpal etedi.

Sonymen qatar, «Taza Qazaqstan. Astana – tazalyq pen tártip úlgisi» atty ekologıalyq aksıa aıasynda elorda mektepterinde, qaldyqtardy qaıta óńdeý jobalary júzege asyp jatyr.

Osyǵan deıin joba aıasynda elordanyń 40-tan astam mektebinde túrli-tústi konteınerlermen jabdyqtalǵan zamanaýı qoqys jáshikteri ornatylǵan bolatyn, bul qaldyqtardy suryptap, keıin qaıta óńdeýdi jeńildetedi. Sol sıaqty qaldyqtardy qaıta óńdeý kólemin ulǵaıtýǵa, mektep oqýshylarynyń ekologıalyq mádenıetin damytýǵa yqpal etedi.