Astanada Memlekettik keńesshi Erlan Qarinniń tóraǵalyǵymen Parlamenttik reforma jónindegi jumys tobynyń tórtinshi otyrysy ótti, dep habarlaidy Dalanews.kz.
Jumys toby byltyr 8 qazanda Prezident ókimimen qurylǵan bolatyn. Alǵashqy otyrysy Memleket basshysynyń qatysýymen 14 qazanda ótti. Sol kúni Prezident tapsyrmasy boiynsha azamattardyń parlamenttik júieni jetildirýge qatysty usynystaryn jinaqtaý maqsatynda e-Otinish platformasy men eGov servisinde «Parlamenttik reforma» arnaiy bólimi ashyldy.
Jumys tobynyń 2 jeltoqsanda ótken ekinshi otyrysynda jańa Parlamentti qalyptastyrý máseleleri qarastyryldy.
Úshinshi otyrys 29 jeltoqsanda uiymdastyrylyp, bolashaq Parlamenttiń zań shyǵarý úderisiniń negizgi tetikteri talqylandy.
Memlekettik keńesshi aldaǵy reformaǵa qatysty qoǵamda jarty jylǵa jýyq ýaqyt boiy keń kólemde talqylaý júrgizilip kele jatqanyn eske saldy. Sonymen qatar Erlan Qarin parlamenttik reforma Memleket basshysy bastamashy bolǵan aýqymdy saiasi jańǵyrýdyń bir bóligi ekenin atap ótti. Oǵan 2019-2021 jyldary júzege asyrylǵan saiasi reformalardyń tórt paketi men 2022 jylǵy Konstitýtsiialyq reforma jatady. Jalpy alǵanda, Prezidenttiń barlyq reformasy memlekettiń institýtsionaldyq ornyqtylyǵyn nyǵaitýǵa, saiasi júieni zamanaýi talaptarǵa beiimdeýge baǵyttalǵan.
Jiynda Parlamentarizm institýtynyń direktory Natalia Pan azamattardan, sarapshylardan jáne qoǵam belsendilerinen kelip túsken usynystar jóninde jinaqtalǵan aqparatpen bólisti. Búginge deiin e-Otinish jáne eGov platformalaryndaǵy «Parlamenttik reforma» arnaiy bólimi arqyly Jumys tobyna halyq arasynan, sarapshylar qaýymdastyǵynan jáne qoǵamdyq birlestikterden 500-den astam usynys kelip tústi.
Bul jolǵy otyrystyń negizgi taqyryby bolashaq Parlamenttiń basqa da bilik institýttarymen ózara is-qimyl máselelerine jáne birpalataly jańa Parlamenttiń ataýyn qarastyrýǵa arnaldy.
Jumys toby jetekshisiniń orynbasary – Prezidenttiń quqyqtyq máseleler jónindegi kómekshisi Erjan Jienbaev bolashaq Parlamenttiń memlekettik biliktiń basqa da institýttarymen ózara is-qimyly kezindegi ókilettikterine qatysty jalpy tásilder týraly aitty. Bul tásilder Jumys toby músheleri men saiasi partiialardyń usynystary negizinde ázirlengen.
Jumys tobynyń Azat Perýashev, Marat Shibutov, Elnur Beisenbaev, Marat Bashimov, Indira Áýbákirova, Ashat Rahymjanov, Alýa Ibraeva, Únzila Shapaq, Qarlyǵash Jamanqulova, Erlan Sársembaev sekildi músheleri kún tártibindegi máselelerge qatysty óz ideialary men usynystaryn ortaǵa saldy.
Otyrys barysynda Jumys tobynyń músheleri el Konstitýtsiiasyna engiziletin aldaǵy ózgeristerdiń aýqymdy ekenin jetkizdi. Bul ózgerister zań shyǵarýshy bilik jumysynyń tiimdiligin arttyryp qana qoimai, negizgi memlekettik institýttar arasyndaǵy ózara is-qimyldyń tutas júiesin edáýir jańǵyrtýǵa múmkindik beredi.
Jiyn qorytyndysy boiynsha Jumys tobynyń jetekshisi – Memlekettik keńesshi kelip túsken usynystardyń barlyǵyn jinaqtap, jan-jaqty taldaýdy tapsyrdy.
Parlamenttik júieni jetildirýge qatysty tásilderdi ázirleý isi Jumys tobynyń aldaǵy otyrystarynda kezeń-kezeńimen jalǵasatyn bolady.
