Ońtústik kúnderi aiasynda búgin elordadaǵy «Oqýshylar» saraiynda «Kino – rýhaniiattyń kózi» jobasymen Ońtústikte túsirilgen animatsiialyq jáne kórkem filmder kórsetilimi ótýde.
Tarihi-tanymdyq, balalar men jasóspirimderdi patriottyq rýhta tárbieleitin «Otyrardy qorǵaý», «Kieli Qazyǵurt» animatsiialyq filmderi men «Kóne jetigenniń syry» atty telehikaia astanalyq balǵyndardyń nazaryna úsh kún boiyna usynylady.
Atalǵan filmder Elbasy N.Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy aiasynda oblys ákimi J.Túimebaevtyń bastamasymen óńirdegi «SAQ» kinostýdiiasy túsirgen.
Kórsetilimniń ashylý saltanatynda sóz alǵan OQO mádeniet jáne tilderdi damytý basqarmasy basshysynyń m.a Temirhan Asylhan kúngei ólkedegi tarihi-kieli jerlerdi balalar tilimen nasihattaýǵa baǵyttalǵan animatsiialyq filmge degen betburys urpaq tárbiesine de mol áser etip jatqandyǵyn jetkizdi. Sondai-aq, búldirshinderdiń súiikti keiipkerleri, «Qalqanqulaq» teleserialynyń basty rólderin somdaǵan Oljas pen Baqbergen de astanalyq jurtshylyqqa kóterińki kóńil-kúi syilap, Astananyń 20 jyldyǵymen quttyqtady.
Sonymen qatar, óńirimizdiń aýdan, qalalarynda da jergilikti ákimdikterdiń qoldaýymen týǵan jer qasietin tanytatyn birqatar animatsiialyq filmder jasaldy. Olardyń ishinde Otyrar aýdany ákimdigi tapsyrysymen daiyndalǵan «Otyrar dastany», «Kóne qumyranyń syry» jáne Báidibek aýdany ákimdiginiń qoldaýymen «Báidibek bi» filmderi bar.
Biylǵy jyly rýhani jańǵyrý aiasynda «Tóle bi» teleserialy men «Oqsyz», «Ordabasy», «Túrkistan» animatsiialyq filmderi túsirilýde.
