Elordada qazirgi ýaqytta ómir súrý uzaqtyǵy el boıynsha josparlanǵan deńgeıden 3,5 jylǵa joǵary, al 2029 jylǵa belgilengen maqsatty kórsetkishten 2 jylǵa asyp otyr. Bul týraly qalalyq Densaýlyq saqtaý basqarmasynyń orynbasary Aınur Tóleýova málim etti,- dep habarlaıdy Dalanews.kz
Basqarma basshysy orynbasarynyń málimetinshe, ásirese Astanada týberkýlezge qarsy kúrestegi jetistikter aıtarlyqtaı jaqsarǵan.
«Aýrýshańdyq 21,5%-ǵa, al ólim-jitim 6,5%-ǵa azaıdy. Insýltti emdeýde gospıtáldyq ólim-jitim 8%-ǵa tómendedi, al aýrýhanadan shyqqannan keıin úıde bir aı ishinde bolatyn ólim-jitim 32%-ǵa azaıdy. Onkologıalyq kómekti erte anyqtaý úlesi ósip keledi: qazirgi tańda aýrýlardyń 34,6%-y bastapqy kezeńde dıagnostıkalanýda, bul kezde emdeý eń tıimdi», – dep atap ótti ol.
Sonymen qatar, mıokard ınfarktisin emdeýdegi kórsetkishter aıtarlyqtaı jaqsarǵan: barlyq pasıent usynylǵan 120 mınýt ishinde teri arqyly koronarlyq aralasý ortalyǵyna jetkiziledi.
Jedel járdemniń kelý ýaqyty da qysqartylǵan – shaqyrýlardyń 98,1%-y 40 mınýt ishinde oryndalýda.
Vedomstvo ókili sonymen qatar náresteler arasyndaǵy ólim-jitim kórsetkishterindegi oń ózgeristerdi de atap ótti. Mysaly, tuqym qýalaıtyn damýdaǵy aqaýlardan bolatyn ólim-jitim eki esege tómendep, 14-ten 8 jaǵdaıǵa deıin qysqardy. Sondaı-aq, bıyl ınfeksıalyq sebepterden bolatyn ólim-jitim tirkelgen joq.
