Elordadaǵy №43 qosymsha bilim berý mektebiniń oqýshylary men ustazdary óz qoldarymen alma baǵyn otyrǵyzyp, baptap ósirdi. Biyl olar 60 keliden astam ónim jinady,- dep habarlaidy Dalanews.kz
Baqqa «Jasyl el» jasaǵynyń músheleri de birge kútim jasady.
«Búgin biz mektebimizdiń aýlasynda ósirgen almalarymyzdy terip jatyrmyz. Munda tórt túrli sorttaǵy 30-dan astam aǵash otyrǵyzylǵan. Qatty aiaz kezinde baqtyń jartysynan aiyrylyp qala jazdadyq, biraq kóktemde oqýshylar úsik shalǵan alma aǵashtaryn qaita qalpyna keltirýge kiristi. Mine, búgin sebetimizge 60 keliden astam alma jinaldy. Bul – bizdiń oqýshylarymyzdyń, ustazdarymyzdyń jáne «Jasyl el» jastarynyń eńbegi. Baqqa kútim jasaý, eńbegimiz – «Taza Qazaqstan» baǵdarlamasynyń aiasynda júzege asýda. Búgin biz óz ónimimizge ǵana emes, balalarymyzdyń jaýapkershilikti ári eńbekqor bolyp ósip kele jatqanyna qýanyp otyrmyz», – dedi mektep direktory Rýslan Tákebaev.
«Jasyl el» jasaq músheleri de óz alma baǵynyń jemis bergenine erekshe qýandy.
«Biz aǵashtarǵa kútim jasap, ziiankes jándikterden qorǵadyq. Endi mine, osyndai tamasha ónim alyp otyrmyz. Ortaq eńbegimizdiń nátijesin kórý – erekshe sezim», — deidi olar.
Bul iri ekologiialyq baǵdarlama balalarda tabiǵatqa degen sanaly jáne uqypty qarym-qatynasty qalyptastyrýǵa baǵyttalǵan. Joba mektepte úshinshi jyl júzege asyrylyp keledi.
Baǵdarlamanyń basty bóligi – mektep aýmaǵynda oqýshylar, ustazdar jáne ata-analar kúshimen ósirilgen ónimdi jinaý. Muǵalimderdiń jetekshiligimen balalar qiiar, qyzanaq, kók shóp, oramjapyraq, qyzylsha jáne sándik ósimdikter egedi. Dán sebýden bastap, ónimdi jinaýǵa deiingi barlyq kezeńdi oqýshylar ózderi atqarady.
Jinalǵan ónim oqý protsesinde jáne turmysta paidalanylady: bir bóligi mektep ashanasyna jiberilse, ekinshi bóligi jobaǵa belsendi qatysqan oqýshylardyń otbasyna beriledi.
Ótken jyly bul mektep respýblikalyq «Jasyl alań» jobasynda jeńiske jetip, 1 000 000 teńge grant iegeri atandy. Osy qarjyǵa zamanaýi mektep baqshasy qurylyp, onda arnaiy daiyndalǵan egin alqaptary, tamshylatyp sýarý júiesi, qajetti quraldar men jabdyqtar ornatyldy. Sonyń arqasynda balalar aýyl sharýashylyǵy daqyldaryn naqty agrarlyq jaǵdaiǵa uqsas ortada ósirý múmkindigine ie boldy.
Búginde baqshada biologiia, eńbek, dúnietaný pánderi boiynsha sabaqtar, sondai-aq synyptan tys is-sharalar men sheberlik sabaqtary ótkiziledi.
Sońǵy úsh jylda mektep 15 iri ekologiialyq aktsiia uiymdastyrdy.
