Astanada qalalyq jedel meditsinalyq járdem stantsiiasy ǵimaratynyń qabyrǵasyna qyzmettik mindetin oryndaý barysynda qaza tapqan feldsher Uldana Myrzýanǵa arnalǵan eskertkish taqta ornatyldy, dep habarlaidy Dalanews.kz
Eskertkish taqtanyń ashylý rásimine Densaýlyq saqtaý ministri Aqmaral Álnazarova men Uldana Myrzýannyń anasy Sálima Ishanqulqyzy, týystary jáne jedel meditsinalyq járdem stantsiiasynyń qyzmetkerleri qatysty.
«Uldana Qaldarhanqyzy 2017-2021 jyldary Astana qalasyndaǵy «Danalyq» kolledjinde emdeý isi mamandyǵy feldsher biliktiligi boiynsha bilim alyp, oqý ornyn úzdik diplommen bitirgen. Búgin sol kolledjde Uldananyń atyndaǵy arnaiy aýditoriia ashylady. Oqý bitirgeli 4 jyl kóleminde ómiriniń sońyna deiin Astana qalalyq Jedel meditsinalyq járdem stantsiiasynda eńbek etti. Jas bolsa da, kásibi adaldyǵymen kózge túsken jáne shuǵyl jaǵdailarda óz betinshe sheshim qabyldai alatyn bilikti mamanǵa ainaldy. Uldana Qaldarhanqyzynyń týǵan-týystaryna, anasyna, jaqyndaryna, jubaiyna, jedel járdem qyzmetkerleri ujymyna Qazaqstandaǵy meditsina salasynda jumys istep júrgen 300 myńnan asa qyzmetkerdiń atynan, óz atymnan qaiǵyryp, kóńil aitamyn», – dedi ministr.
Sonymen qatar ministr Uldana Myzýannyń esimi otandyq meditsina tarihynda jazylatynyn atap ótti.
Uldana Myrzýannyń anasy Sálima Ishanqulqyzy marqum qyzyna qurmet kórsetilip jatqany úshin Densaýlyq saqtaý ministri men meditsina salasynyń qyzmetkerlerine alǵysyn aitty.
Astana qalalyq jedel meditsinalyq járdem stantsiiasynyń qyzmetkerleri eskertkish taqta aldyna gúl shoqtaryn qoidy.
Eskertkish taqtanyń ashylýynan keiin jedel meditsinalyq járdem stantsiiasy mekemesinde jaiylǵan dastarhan basynda Astana qalasyndaǵy Sheih Kýnta qajy meshitiniń bas imamy Bekqoja Ómirzaq marqumnyń rýhyna arnap Quran baǵyshtady.
Esterińizge sala keteiik, Uldana Myrzýan 2025 jylǵy 8 qarashada Astana qalasynda kóp qabatty úilerdiń biriniń qasbeti sógilip, birneshe adam zardap shekken. Turǵyndar shaqyrtqan jedel járdem quramynda feldsher Uldana da bolǵan. Aýyr jaralanǵan jas maman on kúnnen keiin – 18 qarashada aýrýhanada kóz jumdy.
