Astananyń Qalalyq alańynda Uly Otan soǵysyndaǵy Jeńistiń 80 jyldyǵyna arnalǵan merekelik konsert ótti. Bul shara bolashaq urpaqtyń erkindigi men táýelsizdigi úshin janyn qıǵan qaharmandardyń rýhyna taǵzym etip, olardyń erligin máńgi este saqtaýǵa baǵyttaldy, dep habarlaıdy Dalanews.kz.
Merekelik is-sharany "Eýrazıalyq monıtorın" Qazaqstan ortalyǵy uıymdastyryp, elordaǵa jınalǵan myńdaǵan turǵyn men qala qonaqtary soǵys qaharmandaryna qurmet bildirý úshin bas qosty.
Konsert Uly Otan soǵysynyń qaharmandaryna taǵzym retinde ótti. Erligimen el jadynda qalǵan Talǵat Bıgeldınov, Sergeı Lýganskıı, Saǵadat Nurmaǵambetov, Ivan Panfılov, Baýyrjan Momyshuly, Núrken Ábdirov, Málik Ǵabdýllın, Sabyr Rahymov, Mánshúk Mámetova, Álıa Moldaǵulova, Rahymjan Qoshqarbaev, Hıýaz Dospanova syndy erlerdiń esimderi erekshe ataldy.
Konsert barysynda maıdan ánderi, áskerı marshtar men zamanaýı patrıottyq týyndylar shyrqaldy. Sonymen qatar soǵys ardagerleriniń shynaıy hattary men estelikterine negizdelgen teatrlandyrylǵan kórinister qoıylyp, kórermenge tereń áser qaldyrdy.
Sahnada tanymal qazaqstandyq ártister men shyǵarmashylyq ujymdar, sondaı-aq jas oryndaýshylar óner kórsetti. Olar soǵys jyldaryndaǵy halqymyzdyń qaısar rýhyn, birligin jáne erligine degen alǵys sezimin jetkizdi. Ásirese, poezıa men mýzyka úndesken áserli kórkem qoıylymdar kórermendi beı-jaı qaldyrmady.
Bul kesh – tarıhı jadymyzdy jańǵyrtyp, erlik pen otansúıgishtik uǵymdaryn urpaq sanasyna sińirýge baǵyttalǵan taǵylymdy shara boldy.
"Búgin biz Astananyń júreginde – Qalalyq alańda jınalyp, Jeńistiń 80 jyldyǵyn erekshe qurmetpen atap ótýdemiz. Bul — barsha adamzat tarıhynda óshpes iz qaldyrǵan Uly Jeńis. Mýzyka, sóz ben jaryq sahnada úılesip, ómirin qurban etken erlerge degen tereń qurmettiń sımvolyna aınaldy", — dedi "Eýrazıalyq monıtorıń" ortalyǵynyń dırektory Álibek Tájibaev.
Tek Astanada ǵana emes, osy sátte álemniń túkpir-túkpirinde batyrlardyń urpaqtary uıymdastyrǵan merekelik konsertter men saltanatty is-sharalar ótýde.
"Biz maıdanger qaharmandar men eńbek armıasynyń tyldaǵy erleriniń aldynda bas ıemiz. 1941 jyldyń otty shebinde Otanyn qorǵaýǵa attanǵan árbir jaýyngerge, al tylda jeńisti jaqyndatqan árbir eńbek adamyna máńgilik taǵzym. Qazaqstannan 1 mıllıon 200 myńnan astam jerlesimiz maıdanǵa attandy, olardyń 500-den astamy Keńes Odaǵynyń Batyry atandy. Talǵat Bıgeldınov, Baýyrjan Momyshuly, Mánshúk Mámetova, Álıa Moldaǵulova syndy erlerdiń esimi el jadynda máńgilik saqtalady", — dep sózin túıindedi Álibek Tájibaev.
