استانانىڭ قالالىق الاڭىندا ۇلى وتان سوعىسىنداعى جەڭىستىڭ 80 جىلدىعىنا ارنالعان مەرەكەلىك كونسەرت ءوتتى. بۇل شارا بولاشاق ۇرپاقتىڭ ەركىندىگى مەن تاۋەلسىزدىگى ءۇشىن جانىن قيعان قاھارمانداردىڭ رۋحىنا تاعزىم ەتىپ، ولاردىڭ ەرلىگىن ماڭگى ەستە ساقتاۋعا باعىتتالدى، دەپ حابارلايدى Dalanews.kz.
مەرەكەلىك ءىس-شارانى "ەۋرازيالىق مونيتورين" قازاقستان ورتالىعى ۇيىمداستىرىپ، ەلورداعا جينالعان مىڭداعان تۇرعىن مەن قالا قوناقتارى سوعىس قاھارماندارىنا قۇرمەت ءبىلدىرۋ ءۇشىن باس قوستى.
كونسەرت ۇلى وتان سوعىسىنىڭ قاھارماندارىنا تاعزىم رەتىندە ءوتتى. ەرلىگىمەن ەل جادىندا قالعان تالعات بيگەلدينوۆ، سەرگەي لۋگانسكيي، ساعادات نۇرماعامبەتوۆ، يۆان پانفيلوۆ، باۋىرجان مومىش ۇلى، نۇركەن ءابدىروۆ، مالىك عابدۋللين، سابىر راحىموۆ، مانشۇك مامەتوۆا، ءاليا مولداعۇلوۆا، راحىمجان قوشقاربايەۆ، حيۋاز دوسپانوۆا سىندى ەرلەردىڭ ەسىمدەرى ەرەكشە اتالدى.
كونسەرت بارىسىندا مايدان اندەرى، اسكەري مارشتار مەن زاماناۋي پاتريوتتىق تۋىندىلار شىرقالدى. سونىمەن قاتار سوعىس ارداگەرلەرىنىڭ شىنايى حاتتارى مەن ەستەلىكتەرىنە نەگىزدەلگەن تەاترلاندىرىلعان كورىنىستەر قويىلىپ، كورەرمەنگە تەرەڭ اسەر قالدىردى.
ساحنادا تانىمال قازاقستاندىق ارتىستەر مەن شىعارماشىلىق ۇجىمدار، سونداي-اق جاس ورىنداۋشىلار ونەر كورسەتتى. ولار سوعىس جىلدارىنداعى حالقىمىزدىڭ قايسار رۋحىن، بىرلىگىن جانە ەرلىگىنە دەگەن العىس سەزىمىن جەتكىزدى. اسىرەسە، پوەزيا مەن مۋزىكا ۇندەسكەن اسەرلى كوركەم قويىلىمدار كورەرمەندى بەي-جاي قالدىرمادى.
بۇل كەش – تاريحي جادىمىزدى جاڭعىرتىپ، ەرلىك پەن وتانسۇيگىشتىك ۇعىمدارىن ۇرپاق ساناسىنا سىڭىرۋگە باعىتتالعان تاعىلىمدى شارا بولدى.
"بۇگىن ءبىز استانانىڭ جۇرەگىندە – قالالىق الاڭدا جينالىپ، جەڭىستىڭ 80 جىلدىعىن ەرەكشە قۇرمەتپەن اتاپ وتۋدەمىز. بۇل — بارشا ادامزات تاريحىندا وشپەس ءىز قالدىرعان ۇلى جەڭىس. مۋزىكا، ءسوز بەن جارىق ساحنادا ۇيلەسىپ، ءومىرىن قۇربان ەتكەن ەرلەرگە دەگەن تەرەڭ قۇرمەتتىڭ سيمۆولىنا اينالدى"، — دەدى "ەۋرازيالىق مونيتورينگ" ورتالىعىنىڭ ديرەكتورى الىبەك تاجىبايەۆ.
تەك استانادا عانا ەمەس، وسى ساتتە الەمنىڭ تۇكپىر-تۇكپىرىندە باتىرلاردىڭ ۇرپاقتارى ۇيىمداستىرعان مەرەكەلىك كونسەرتتەر مەن سالتاناتتى ءىس-شارالار وتۋدە.
"ءبىز مايدانگەر قاھارماندار مەن ەڭبەك ارمياسىنىڭ تىلداعى ەرلەرىنىڭ الدىندا باس يەمىز. 1941 جىلدىڭ وتتى شەبىندە وتانىن قورعاۋعا اتتانعان ءاربىر جاۋىنگەرگە، ال تىلدا جەڭىستى جاقىنداتقان ءاربىر ەڭبەك ادامىنا ماڭگىلىك تاعزىم. قازاقستاننان 1 ميلليون 200 مىڭنان استام جەرلەسىمىز مايدانعا اتتاندى، ولاردىڭ 500-دەن استامى كەڭەس وداعىنىڭ باتىرى اتاندى. تالعات بيگەلدينوۆ، باۋىرجان مومىش ۇلى، مانشۇك مامەتوۆا، ءاليا مولداعۇلوۆا سىندى ەرلەردىڭ ەسىمى ەل جادىندا ماڭگىلىك ساقتالادى"، — دەپ ءسوزىن تۇيىندەدى الىبەك تاجىبايەۆ.
