Astanada Jana Beles Fest shyǵarmashylyq festivali ótip jaty
Elordada Qazaqstan halqynyń birligi kúnin merekeleý aiasynda «Astana jastary» jastar resýrstyq ortalyǵynyń bastamasymen Jana Beles Fest shyǵarmashylyq festivali bastaldy, dep habarlaidy Dalanews.kz qala ákimdiginiń resmi saityna silteme jasap.
Festival 29 sáýirge deiin jalǵasady jáne eń talantty stýdentterdiń basyn qosady.
Festivalge «Vokal», «Ulttyq bi», «Zamanaýi bi», «Ulttyq aspaptar», «Sahnalaý» jáne «Úzdik jankúierler» syndy nominatsiialar kiredi.
«Festivaldiń maqsaty – jastar arasynda mádeniet pen ónerdi, kóshbasshylyq jáne kommýnikativti daǵdylardy damytý, dostyq qarym-qatynasty nyǵaitý, daryndy jastardy qoldaý. Festival elordada ekinshi ret ótkizilip otyr. 2019 jyly alǵash ret uiymdastyryldy. Biyl 35 kolledjdiń stýdentteri qatysyp jatyr. Jabylý jáne marapattaý rásimi 29 sáýirde Beibitshilik jáne kelisim saraiynda ótedi», - dedi «Astana jastary» jastar resýrstyq ortalyǵynyń bólim basshysy Arailym Saparáli.
Kontsertte «Vokal» nominatsiiasynyń qatysýshysy Nargiz Malikova «Qazaq eli osyndai» patriottyq ánin oryndady. Onyń aitýynsha, ol áigili ánshi Marjan Arapbaevanyń jankúieri, onyń vokaldyq sheberligine ǵana emes, harizmasyna, sondai-aq alýan repertýaryna da tánti.
«Men qyzmet kórsetý jáne týrizm kolledjinde oqimyn. Bul festival – meniń alǵashqy tájiribem. Onda qoiylym aldynda erekshe atmosfera bar. Aspaz mamandyǵyn oqyp jatqanyma qaramastan, vokalǵa degen qushtarlyǵym bala kezimnen bar. Bul jer – óz ónerińdi ǵana emes, sonymen qatar óz talantyńdy kórermenmen bólisýdiń tamasha múmkindigi», – dedi festival qatysýshysy.
